Euro 2024-in player transfer a nghawng dawn em?

Football ngainatutena kan nghahhlelh, tlumtea thlira kan thlir, European Championship 2024 chu a ṭiak leh ta der mai - football ngainatu tan chuan a lunglenthlak a, zan menrei pawh a tuk lamah a nghawng na viau mah se, kan hmaa ennawm min chhawpsak nena khaikhina ralah chuan a zuamawm kan ti a, kan mengrei leh nge nge ṭhin a nih kha!

Champion Spain-in nomawi nen an ram an lut tawh a, a lo hmuaktu mipui pawh tam tak an ni - an ramah chuan Euro lo chu titi a leng meuh rih lo a, khawdang an hawi thei lo. Hetihlai hian major tournament-in a ken tel langsar tak chu football transfer a ni a, thawm ri ring tak tak hriat tur a awm nual.

Club football lama beisei phak lote pawh major tournament-a an chet ṭhat chuan club langsar tak takin an rim nghal a, match hmuhnawm kan sawi laih laih kha football transfer-in a chhunzawm a, football tel loin hringnun hi kan hmang hman meuh lo a ni ber!

Florian Wirtz (Germany)

Bayer Leverkusen-in season duhawm tak an hman avangin Florian Wirtz-a'n ngaihven a hlawh sa hrim hrim a, Euro-a a chet ṭhat zui avangin a thawm a ri ring lehzual. Kum 21 mi midfielder hian group stage-a Germany match khelh zawng zawngah bul a ṭan vek a, quarterfinal a thlenpui.

German club-ah kum 2027 thleng contract neiin, Leverkusen hian hralh tumna an nei lo nia sawi a ni a, mahse, Real Madrid leh Barcelona ten an thlithlai mek. Wirtz-a pa leh a agent chuan Wirtz hi a chhuah loh tur thu an sawi a, thawm erawh a reh phah lo.

Marc Guehi (England)

Gareth Southgate-a rinrawl Harry Maguire a inhliam a, a hmun ruakah Crystal Palace defender Marc Guehi a ding. Kum 24 mi centre back hian England tan a hna a tlin hle - Premier League a khel ṭha sa bawk nen, English top club-ten an duh nia sawi a ni.

Guehi hian kum 2021 khan Palace hi Chelsea aṭangin a pan a, kum nga chhung atan contract a ziak. Arsenal leh Manchester United ten an hel mek nia sawi a ni a, Palace tan chelh a harsa ang.

Xavi Simons (Netherlands)

Paris St-Germain midfielder Xavi Simons hi naupang tê a nih aṭanga ngaihven hlawh tawh a ni a, Dutch media-ten sel nasa viau mah se, Netherlands-in Euro semifinal an luh theih nana player pawimawh a ni. Kum 21 mi Simons hian Euro-ah khan match ruk khela goal khat khungin, assist vawi hnih a nei a, 89.17% a pass dik thei.

Season hman zawh takah khan RB Leipzig-ah loan-a khelin, match 43-ah goal 10 a khung a, assist vawi 15 a nei bawk. PSG hian chhuahtir an phal nia sawi a ni a, loan-a la duh tan pawh loan zawha lei theihna dan ziak telin hawh theih a ni - Manchester United, Arsenal leh Newcastle United hming lam rik a ni.

Nico Williams (Spain)

Spain champion theih nana player langsar chu Nico Williams a ni a, final-ah phei chuan player of the match atan thlan a ni hial. Kum 22 mi chauh a la nih bawk avangin Athletic Bilbao forward hian hmabak a la nei êng hle.

Nico hian Georgia laka 4-1 a an chak ṭumin goal a khung a, final-ah England lakah a khung bawk. Barcelona chuan Nico hi an hmu tai hle nia sawi a ni a, lei chhuak tur erawh chuan sum an sen huai ve deuh a ngai ang.

Joshua Kimmich (Germany)

Bayern Munich full back Kimmich hi German club tan player langsar a ni reng a, Germany-ah hmun pawimawh a chang bawk. Euro khelh zawh takah khan inkhel zawng zawngah bul a ṭan vek a, quarterfinal a paltlang pui thei ta lo thung.

Kum 29 mi Kimmich hian Bayern tan season kua zet khel tawhin, kum khat bak contract a nei tawh lo. German club hian a contract zawh hmaa hralh mai an pawi ti lo nia sawi a ni a, Liverpool, Arsenal leh Manchester City ten an duh nia sawi a ni a, pound maktaduai 40 vel sen a ngai thung ang.

Riccardo Calafiori (Italy)

Bologna defender Calafiori-a'n Serie A lamah season duhawm tak a hmang a, Euro-ah Italy chu quarterfinal hruai thleng thei lo mah se, a mimal tak chuan a khel ṭha thung - hei vang hian European club lianten an thlithlai mek.

Kum 22 mi centre back hi Arsenal nen sawizawm a ni a, AS Roma, Genoa leh FC Basel tan pawha lo khel tawh defender hi Gunners nen inrem tawh ang hiala sawi a ni a, mahse, Italian club hian €50mtd bakah a khelh ṭhat dan a zira sum pek belh an phut - Basel chuan hralh a niha 50% tel theihna dan an nei tel ve bawk a, hei hi tihniam turin Bologna hian Basel hi an dawr mek bawk nia sawi a ni.

Georgiy Sudakov (Ukraine)

Shakhtar Donetsk midfielder Sudakov hi in la hre tam lo mai thei. Mahse, Euro 2024-ah khan Ukraine tan group stage match thum a khel vek a, point li an hmu chungin round of 16 erawh an lut phak ta lo - heti chung hian Sudakov erawhin ngaihven a hlawh zui.

Kum 21 mi midfielder hian Shakhtar Donetsk tih loh, club dang tan a la khel ngai lo a, Chelsea-in an rim ngawrh hle nia sawi a ni. Hetihrual hian Ukrainian club hian £65mtd aia tlawma hralh an tum lo nia sawi a ni a, Arsenal, City leh Liverpool hming pawh lam rik zingah a tel.

Dani Olmo (Spain)

Kum 26 mi Olmo hian Euro ṭantirhah Spain tan hmun chang lo mah se, Pedri inhliam hnuah hmun pawimawh a chang chho a, goal thum khunga assist vawi hnih neiin, top scorer a ni. Barcelona academy aṭanga chhuak ni mah se, a professional zinkawng zawh ṭanna erawh Dinamo Zagreb a ni daih!

RB Leipzig forward hian season hman zawh takah khan match 25 khela goal riat khungin, assist vawi nga a nei a, Manchester City, Manchester United, Chelsea leh Liverpool nena sawi zawm niin, German club-a a contract-ah hian £50mtd-a lei chhuah theihna dan a tel a, hei hi July 20-ah chuan a tawp tawh dawn thung.

Khvicha Kvaratskhelia (Georgia)

Georgia thiampuipa Kvaratskhelia hi kum 23 chauh ni mah se, European football-ah a mikhual lo hle. Napoli ṭantute phei chuan football legend Diego Maradona hming chawiin 'Kvaradona' tih hminglem an pe hial a, 2022-23 season khan Serie A nomawi a chawipui hial.

Season hman zawh takah khan Napoli-in beisei phak lo mah se, Kvaradona erawh chet ṭhat chhunzawmin, match 45-ah goal 11 khungin, assist vawi kua a nei. Football ram tenau Georgia chu a vawi khat nan Euro khelhpuiin, last 16 a hruai thleng a, PSG leh Liverpool nen sawizawm a ni. A man erawh £85.2mtd vel nia sawi a ni a, Napoli boss Antonio Conte chuan an player hi an chhuahtir loh tur thu a sawi thung.