Argentina tan Di Maria a herliam ta!

Copa America final minute 117-na a ni a, goal an khung vang ni loin Hard Rock Stadium chhunga Argentina inkhel entute chu an ding ṭhup a, khelmual aṭanga an player duh em em mai Angel di Maria kal chhuak tur chu zahna chibai an buk.

Khelmual sira ding assistant referee chuan player inthlakna board a lek chhuak a, number 11 chu a senin a rawn inziak. Argentina jersey number 11 hatu Di Maria chu thlak a ni, zawi muanga chhuak pahin a ban a lek kang a, ram tana a match hnuhnung chu a thlah liam.

Di Maria hian ram tan sulhnu tam tak a hnutchhiah a, sawi vek sen pawh a ni lo. A hun hmasa lamah nomawi lian tham chawi nghal pawp pawp lo mah se, a tawp lama an hlawhchhuahte erawh thil dang nena thleng phal rual loh khawpa hlu an ni.

A bul ṭanna

Di Maria hian Argentina tan kum bithliah inelna aṭangin bul a ṭan, an ram tan hian kum 2007 khan South American U-20 Championship khel tura thlan a ni a, hei hi ram tana kohna a dawn hmasak ber a ni.

A kum rualpui zingah a che thei pawl a ni a, hun rei lote chhungin khelmual chhungah a langsar nghal. Kum 2007 hian U20 World Cup a khel a, a hnu kum khat a liam leh meuh chuan Beijing Olympics games 2008 chu ram tan a khel.

Olympic hi kum 23 hnuai lam inelna a ni a, senior player tel thei zat bituk a ni ṭhin. Di Maria chu kum naupang zinga mi a ni a, palyer pawimawh erawh a ni - Nigeria nen gold medal an inchuhna inkhelah chakna goal a khung a ni.

Argentina senior team tan pawh koh a ni thuai a, kum 2008 khan khel ṭanin 2010 World Cup leh 2011 Copa America te kha chuan beisei phak loin an zinkawng a tawp - 2014 World Cup kha chuan nomawi an khawih thuak hman!

Quarterfinal-ah Belgium nen an inhmachhawn a, hemi ṭum hian hliam a tuar - La Albiceleste hian final lut zui mah se Di Maria erawh a inkhel ve thei tawh lo, khelmual sir aṭangin a ṭhiante inkhel a en a ngai ta zawk.

Germany tana Mario Gotze-a goal khung chu a lo thlir ve reng a, tihtheih nei si loin mual sirah a lo insehruh hle a ni. Vanduainain a tlak buak chhunzawm - Copa America 2025 leh 2026 final lut mah se penalty-a Chile an hneh lo lai chu hliam vangin mual sir aṭang bawkin a en a ngai.

A la tawp mai lo, beiseina sang tak nen 2018 World Cup an khel a, team ṭha France nen last 16-ah an inhmachhawn. Di Maria hian goal mawi leh hriatreng tawh tur a khung, mahse chakpui nan a tawk zo lo a, an tum ram thleng loin an tla.

A hun a thleng

Thil ṭha zawng zawng hi vawi leh khata neih vek theih a ni lo a, a chang chuan dawhthei taka nghah a ngaih ṭum pawh a awm ṭhin - Di Maria erawhin Argentina tana nomawi lian leh hlu bik chawi turin a nghah rei a ngai hle.

Argentina Football Federation chuan kum 2018 coach thar atan Lionel Scaloni an ruai a, ani hian tunhma lamin sulhnu ropui tak a nei hran lo, chuvangin eng ang taka beisei san tur nge hriatthiam a harsa - Di Maria leh Lionel Messi te tan hun hnuhnung lam a ni tawh bawk si.

Scaloni kaihhruaina hnuaiah zawimuangin team an din a, a senior player ṭhenkhat thlauh thlain, a chhawr tlak china ngaih a chhawm, a chhawm zingah Di Maria pawh a tel - a lakah beiseina sang tak a nei bawk.

Copa America 2021 chu Brazil ramah khelh a ni a, a thlengtu hi champion tura rinkai an ni bawk - Argentina nen final an khel a, world champion vawi nga ni tawh Brazil hi Neymar hoa inlan niin an buk pawh a rit viau.

Mahse, minute 22-na a ni a, mual lai aṭangin midfielder Rodrigo De Paul chuan hla taka awm Di Maria tan ball a pe thut a, ani hi Brazilian defender karah dawk chhuakin a ke vei lamin ball a dang a, a hman thiam ke vei lam bawkin keeper Ederson man phak lohin a chip khum.

Di Maria goal khat hmangin Brazil 1-0 in an hneh a, football ngaina leh atchilh ram Argentina chuan kum 28 chhung an nghah tawh Copa America nomawi an hlawh chhuak, ram tana Di Maria hlutna chu engti zawng maha sawi nep theih a ni lo.

Copa America champion an nih avang hian Euro champion Italy nen Finalissima an khel a, khawmualpui pahnih champion intawnnaah pawh hian Di Maria hian goal a khung leh a, an ram tan nomawi hlu leh danglam tak a hlawh chhuak.

World champion

Football chauh a ni lo a, infiamna chauh pawh a ni hek lo, ennawm ropui ber tia an sawi ṭhin chu FIFA World Cup a ni. Player zawng zawngten an duhthusam chu World Cup champion nih a ni ṭhin.

Di Maria pawh a bang chuang bik lo, khawvel champion nih chu a thil châk a ni. Beiseina sang tak nen World Cup khel turin Qatar an pan a, an match hmasa berah an chesual zui - sawiselna an tawk nasa hle.

Mahse, coach Lional Scaloni naute hi an tho chhuak leh a, final-ah World Cup hmasa lama an ngam loh France hnehin an champion, nomawi inchuhna inkhelah hian Di Maria hian goal a khung leh ta tho a, hun pawimawhah a langsar zel tihna a ni.

World Cup a zo a, ram tana inkhelh chawlhsan ve tawh mai a duh. Mahse, captain Messi-a'n Di Maria hi la chawl lo turin a ngen a, a ṭhianpa ngenna ngai pawimawhin Copa America 2024 chu a khel leh ta zawk.

Kum 36 mi a ni tawh a, a vanglai a hmang zo ve tawh. Copa America 2024 ah pawh player pawimawh a la ni tho a, inkhel harsa leh boruak sangah a tawnhriat neih ṭhat an chhawr ṭangkai ṭhin, inelna neih laiin a tan hun hnuhnung a nih tur thu a sawi zui ta a ni.

Argentina coach Scaloni chuan, "Di Maria hi legend a ni. Copa final a khel kha duhthusam a ni, a nihna takah chuan kum 25 mi ang maiin a la tlan char char, khatiang taka ram tana inpekna kha a hlu a, a aia sang kan beisei thei tawh chuang lo ang.

"Khelmual a chhuahsan dawna fans lamin zahna an lantir kha a phu takzet a, ram tana a football zinkawng hi film hmuhnawm tak, a tawpa hlimawm taka tawp ang a ni, hetianga hun hnuhnung hman hi a phu," tiin a sawi.

Duhthusam ang a ni - Di Maria

Argentina tuna a hun hnuhnung a hman danah Angel di Maria a lawm, a tan duhthusam a nih thu a sawi. Copa America nomawi chawi chung ngeiin an ram jersey a hak tawpna a thleng a ni.

Argentina tan match 145 a khelh aṭanga goal 31 khungtu Di Maria chuan, "Duhthusam ka nei ṭhin, ram tana inkhelh ve a, kan ram tana tournament lian khelh a, champion nomawi chawi kha ka suangtuah ṭhin.

"Copa America kha ka suangtuah a, chumi hnuah final tal lut ila tih ka ka duhthusam a ni leh a, a tawpah chuan champion ila tih kha ka duhthusam theih hnuhnung ber a ni a, chu thil chu a thleng dik ta a ni.

"Ram tana hlawhtlinna kan chan theih chhan hi player chhuak thar ṭha tak tak kan neih vang a ni a, anni hian tun huna hlimna hi min hruai thleng. Hetiang baka hun nuam leh hlimawm hi a awm thei tawh chuang lo ang," a ti.

Argentina hian a vawi 16 nan Copa America nomawi an chawi a, South American ramte football hmanga inelna sangah hian champion hnem ber an ni - Uruguay nen record inṭawm an neih chu an kalsan.

Di Maria chuan, "Hetiang zat champion theih hi a namai lo, nomawi kan ngah avang hian a awlsam anga ngaitu pawh an awm mai thei. Mahse, chutiang ngawt a ni lo, nomawi chawi tur hian kei leh ka ṭhiante pawhin kum 10 chuang kan nghak.

"Ka hun hmasa lama ka khelhpuite nen khan hetiang hun hi tawng ho ve ila tihte kha ka ngaihtuah ṭhin, anni khan tun hun kan thleng theih nan tha an lo thawh nasa bawk, engkim mai hi a hunah tak zel a lo thleng," tiin a sawi.

Ram tana a jersey a hlip a, club lamah erawh a la inkhel chhunzawm dawn. Argentina mipui leh khawvel hmun danga La Albiceleste ṭantute thinlungah chuan 'Argentina Jersey No 11' hi a dai tawh ngai lo ang.