Shaqiri-a'n ram tana inkhelh a chawlhsan

Xherdan Shaqiri chuan an ram Switzerland tana inkhelh a chawlhsan thu a puang, kum 14 chhung zet a lo chenchilh tawh Swiss national team chu a mangṭha ta a ni.

Bayern Munich leh Liverpool midfielder hlui hian an ram tan match 125 a khel a, goal 32 a khungsak. Swiss player zingah major tournament pasarih khel thei awmchhun niin, World Cup 2010 aṭanga Euro 2024 thleng khan an ram tan a khel.

Kum 32 mi Shaqiri chuan, "Swiss national team tan tournament pasarih khelin, kan ram tan hian goal pawh ka khung ve nual a, ka hun tawnte kha theihnghilh theih tawh loh tur a ni ang. Tunah chuan national team ka mangṭha a hun ve ta," a ti.

Club lamah chuan FC Basel, Bayern Munich leh Liverpool tan Swiss League, Bundesliga leh Premier League nomawi a chawi a, Bayern leh Liverpool hi Champions League-ah a champion pui ve ve bawk - tunah hian Major League Soccer team Chicago Fire tan a khel mek.