A thiam 10 zingah Krejcikova

Hmeichhe tennis thuneitu sang - Women's Tennis Association (WTA) chuan world ranking thar a ti chhuak a, tun hnaia khelh zawh tak Wimbledon champion Barbora Krejcikova chu a thiam zual 10 zingah a inhlangkai.

Krejcikova hian Jasmine Paolini chu 6-2, 2-6, 6-4 a hnehin Wimbledon champion a ni a, inelna lian Grand Slam huangah a vawi hnih nan a champion a, ranking point a hmuh belh hnem avangin a invawrh sang ta a ni.

Ranking chung berah hian Iga Swiatek a la awmchhunzawm zel - Polish nula hian WTA Finals 2023 hnu aṭang khan number 1 nihna hi a hauh nawn a, chhuk leh tawh loin a awm zel.

Tun season kal laiah Swiatek hian nomawi panga a chawi tawh a, chung zingah chuan French Open nomawi pawh a tel. Clay court inelna lianah hian a zawna a vawi thum nan a champion a ni.

American nula Coco Gauff chu pahnihnaah a awm chhunzawm a, a hnungah Aryna Sabalenka awmin Australian Open champion Elena Rybakina chu palina a ni thung.