MPL4 Playoff-ah Upper Republic FC Vs Reitlang FC

Luangmual FC-in khingpuite hneh vekin Mizoram Premier League Season 4 Qualifier-ah hmahruaitu an ni a, MPL-4 an khel ang. Pahnihna Upper Republic-in MPL-4 khel turin Playoff-ah Reitlang FC an hmachhawn ang, Playoff hi February 5 leh 12-ahte khelh a ni ang.

Nimin khan Lammualah MPL-4 Qualifier round hnuhnung ber khelh a ni a, Upper Republic-in Lunglei khaw club Zotlang FC 3-1 in an hneh. Inkhel hnuhnung zawkah Luangmual FC-in Electric FC 8-2 a hnehin hmahruaina dinhmun an sawhnghet.

Beisei nei Upper Republic

Qualifier aṭangin Upper Republic FC-in MPL khel turin tling zo lo mah se double legged Playoff-a MPL-3 pasarihna Reitlang FC an hneh chuan MPL-4 an khel thei ang.

Upper Republic hian tun season-ah nomawi pahnih an chawi tawh a, Aizawl DFA hnuaiah Season Opening Tournament an champion a, he mi zawh hian Halflong-ah Invitation Tournament-ah an champion leh bawk.

MPL-4 Qualifier-ah Upper Republic-in bul an ṭan ṭha lo a, an game hmasa berah Luangmual 2-6 in an hneh lo. An game hnuhnung pahnihah erawh Upper Republic danglam zawk kan hmu a, Electric FC 6-1 a an sawp hnuah MPL-4 Playoff khel turin an game hnuhnung berah Zotlang FC 3-1 in an hneh.

Nimin inkhelah Zotlangin bul an ṭan ṭha zawk a, Lunglei khaw club hian minute 33-naah Vanlalhlua hmangin hma an hruai. Second half-ah Upper Republic an insiam ṭha a, Joel Laltlanchhuaha, Lalruatpuia, Lalremruata-te'n Aizawl DFA club tan goal an khung a, Upper Republic 3-1 in an chak.

Upper Republic president R Lalhril­liana chuan, "MPL Playoff kan khel thei tur hi kan lawm khawp mai. Player-te leh coaching staff-te thawhrah liau liau a ni. Tin, veng chhung mipui min ṭawiawmna sawi hmaih chi a ni lo, inkhel entu aṭangin kan vengin MPL khelh an duh tak tak tih a chiang," tiin a sawi.

Luangmual an ṭha fâl

MPL Playoff-ah Luangmual el pha an awm lo a, MPL2 finalist hian an khingpui zawng zawng an sawp vek. Nimin khan Luangmual FC hian Electric FC 8-2 in an hneh a, Electric Veng tlangval Lalhlimpuia chuan an veng club lakah hattrick a siam a, Lalduhawma'n goal hnih a khung bakah Jonathan Lalsangzuala, MS Dawngliana leh Vanrammawia te'n goal khat ṭheuh an khung.

Nimin Inkhel Result

Zotlang FC 1-3 Upper Republic FC

ZFC : Vanlalhlua 33'

URFC : Joel Laltlanchhuaha 52'; Lalruatpuia 59'; Lalremruata 83'

Luangmual FC 8-2 Electric FC

LFC : Lalhlimpuia 8', 12', 43'; Jonathan Lalsangzuala 33'; MS Dawngliana 63'; Vanrammawia 76'; Lalduhawma 85', 88'

EFC : KC Lalruatkima 16', 17'