Real Madrid an chhui chhunzawm zel

FIFA-in Real Madrid youth policy chhui chianna an nei chhunzawm zel a, khawvela football thuneitu sang ber hian Spanish club hnenah an player 51 chanchin kimchang an dil.

Club director Emilio Butragueno chuan FIFA-in kum nga chhunga tranfer chungchanga an kalpui dan kimchang an dil tih a sawi tawh a, hlauhthawnna an neih loh thu a lo sawi tel bawk.

Real chuan player 51 zinga 10 chu Spanish an nih thu a sawi a, foreign player 23 te chu an ziah luh tawh thu an tarlan bawk.

FIFA hian kum 18 hnuai lam player lak danah kalphung mumal tak an nei a. FIFA danah chuan international transfer hi kum 18 chunglam tan a theih a, kum 18 hnuai lam tan chuan a hnuaia tarlan dan hi pakhat tal an zawm a ngai thung.

Under 18 player-in ram dang club a zawm theih dan chu :

Football vang ni lo a, player nu leh pate an insawnin.

Kum 16 leh 18 inkar te chu European Union emaw European Economic Area emaw hnuaia rama cheng an nih chuan lak luh theih an ni.

Club aṭanga 100 km bial chhunga cheng an nih chuan lak luh theih an ni.

Real Madrid hian kar hmasa Ningani khan pound maktaduai 2.3-in kum 16-a upa Martin Odegaard chu Stromgodset aṭangin an la lut a. Norway hi European Union hnuaia ram a nih avangin Odegaard-ah hi chuan buaina a awm lo ang.

Barcelona kha kum 18 aia naupang player 10 FIFA dan kalh a an lak luh vangin an hrem a, kum 2015-ah player an la lutthei dawn lo. Catalan club elpui Real Madrid dinhmun a him lo, transfer chungchanga buai thei an ni.