Styrian MotoGP-ah Oliveira a chak

KTM bike khalhtu Miguel Oliveira chuan Pathianni zana tlan zawh tak Styrian MotoGP-ah hnehna a chang a, Portuguese tlangval zingah bike intlansiakna sang bera hnehna chang thei hmasa ber a ni.

Red Bull Ring, Austria-a intlansiakah Maverick Vinales a chetsual avangin 'Red Flag' hman a ngai hial. Champion lai Marc Marquez awm loh laiin rider hrang hrangin hnehna an in chan chhawk zel.

Qualifier lama che ṭha Pol Espargaro-a'n a hmasa ber aṭangin intlansiak bul a ṭan a, inelna an neih ṭan hnuah erawh Joan Mir rawn tlan fuhin lap 16 an tlan thlen chuan second hnihin hma an hruai fal thei hial.

Mahse, 215km/h zeta chaka a tlan laiin Vinales a chesual! A bike aṭanga zuang thlain kawng puiah a tleng a, a bike hi kawng sirah lir chhuakin na takin bang a su. Thil thleng vang hian Red Flag pawh pharh zui nghal a ni. Red Flag hman a nih chuan rider zawng zawng kha an tlan muang a, pit lane-ah an lut. Flag phar a nih hma lap an tlan laia an dinhmun ang chiahah dingin intlansiak an tlan ṭha - tlan hmabak lap 12 chu an tlan chhunzawm.

Inelna an neih chhunzawm leh hnuah Pol Espargo leh Jack Miller te an inum na hle a, hnehna chang tura ngaih pawh an ni. Amaherawhchu na taka an inumna lamah Espargo a kual zau hret a, a elpui Miller tlan muan karah Oliveira-a'n hnehna a chan theih phah.

Kum 25 mi Oliveira chuan, "Hmun tiam ka thleng a, chequered flag an lo vai kha ka hmu. Ka bul hnaiah midang an awm loh avangin hnehna ka chang tih ka hre zui nghal bawk, ka chunga rinna nghat ngamtute vanga hetiang dinhmun thleng thei hi ka ni," a ti. Season kal laiah intlansiak panga a awm tawh, a hmasa pahnihah Fabio Quartararo a chak ber. A hnuhnung pathumah erawh tun hma lama hnehna la chang ngai lo Oliveira, Jack Miller leh Pol Espargaro ten hnehna an chang - champion tur rin thiam a harsa dawn hle.

Yamaha rider Valentino Rossi-a'n dawhsan (podium) lawn phak lo mah se a sang 10 zinga tel turin pakuana dinhmun a luah a, rider championship lamah pawh pasarihna a ni - champion thei leh beiseiawm zingah a la tel.

Rossi chuan, "Tlan chhinna kan neihah khan tihsual pahnih ka nei, 14-na aṭanga bul ṭan chungin pakuana dinhmun ka luah thei a, intlansiak ṭha pangngai tak ka hmachhawn niah ka ngai," a ti. Italian rider hian season tharah Yamaha a chhuahsan dawn a, a pan lam tur a la chiang lo. Championship hmahruaitu Fabio Quartararo-a'n beisei a phak chhunzawm lo, season tir lama vawi hnih chak zawn thei hi 13-naah a thleng; a hmahruiana pawh Andrea Dovizioso lakah a derthawng, Ducati rider nen an inkarah point thum chauh a awm.

MotoGP world champion lai Marc Marquez chu thla thum chhung vel a chawlh chhunzawm a ngai dawn a, season kal lai hi November 22 hian a tawp mai dawn avangin kuminah a hmel kan hmu hman tawh lo mai thei.

Honda rider hi kumina intlansiak hmasa ber Spanish Grand prix-ah a chesual, a ban ruh tliak zai niin dam leh thuai tura ngaih ni mah se zai nawn a ngai a, season kal laiah intlanisak tlan tluan a la neih loh avangin point pawh a la hmu lo.

Tun hnai season sarih chhunga vawi ruk champion thei Marquez tan nomawi humhim beiseina a awm tawh lo a, champion ai chuan inelna hmachhawn leh theih hram chu a beiseina a ni tawh rih zawk ang.

Honda team chuan thuchhuah siamin, "Marquez leh Repsol Honda Team ten tuna kan tum ber chu Marc a intlansiak leh thuai theih nan hmalak zel a ni a, a tan season a tawp loh hram kan beisei," an ti.