Djokovic a inhliam

Novak Djokovic chuan a nghawngah hliam tenau a nei a, Western & Southern Open khelh laia doubles huang aṭangin a inhnukdawk - singles lamah erawh inlan theih ngei a tum thung.

World number 1 Djokovic hi Filip Krajinovic nena ṭangdun tur an ni, tualchhung tlangval pahnih Tommy Paul leh Frances Tiafoe te hmachhawn tur ni mah se a inlan theih loh avangin American player-te hi inkhelh hah ngai loin an tlang a ni.

Western & Southern Open hi US Open inbuatsaih nana hman a ni a, hard court inelna lian hi August 31 aṭanga khelh ṭan tur a nih tawh avangin Serbian tlangval tan hliam neih hi a hun lo hle.

Mipa singles inkhelah seeded parukna Stefanos Tsitsipas chuan Kevin Anderson 6-1, 6-3 in a hneh, seeded pasarihna David Goffin pawhin Croatian tlangval Borna Coric lakah 7-6(6), 6-4 in hnehna a chang ve bawk.

Diego Schwartzman leh Karen Khachanov te pawhin harsa lutuk loin hnehna an chang, tournament khel tura kal zinga mi Kei Nishikori erawh Covid-19 a kai avangin a inkhel ve thei lo - Japanese star hi an endik vawi hnihnaah pawh hri lakah a la fihlim lo a ni.