Wembley-a Spurs hruai thlengtu Eriksen

Tottenham Hotspurs-in Christian Eriksen-a goal hnih hmangin League One club Sheffield United an paltlang hram. Capital One Cup final-ah Spurs hian Liverpool hnehtu Chelsea an hmachhawn ang.

Nilaini zan inkhelah hian Eriksen-a freekick hmangin Spurs-in minute 28-naah hma an hruai a, goal hnihna a lut lawk lo. Second half-ah Sheffield United substitute Che Adams-a'n minute 77-naah an siphurh a sut a, minute hnih hnuah kum 18-a upa hian hmahruaina goal a khung leh bawk.

First leg-ah Spurs-in Andros Townsend-a goal hmangin White Hart Lane-ah hnehna an chang a, League Cup-ah away goal rule a awm loh avangin Bramall Lane-a Sheffield-in 2-1 a hma an hruai chiah hian hun tawp se extra time khelh tur a ni.

FA Cup barakhaih zan thleng nawn mai tura a lan laiin minute 88-naah Harry Kane pass chu Eriksen-a'n goal-ah a chantir a, Bramall Lane-ah 2-2 in team pahnih an inhnehtawk a; aggregate-ah Spurs 3-2 in an chak.

London Derby

League Cup final hi March 1 hian Wembley-ah khelh a ni dawn. Spurs leh Chelsea hi League Cup final-a an vawi khat inhmachhawnna tur a ni lo a, 2008 League Cup final-ah Spurs-in Chelsea hnehin an champion. Kum thar niah Spurs hian Jose Mourinho hote hi 5-3 in Premier League-ah an hneh bawk.

Amaherawhchu, League Cup final khelh hma ni thumah Spurs hi Europa League khel turin Italy-ah an zin dawn a, Fiorentina an hmachhawn dawn. Champion tura rinkai zawk chu Liverpool captain Steven Gerrard-a Wembley kalkawng daltu Chelsea an ni ang.

Rising star

Tottenham star Harry Kane-a'n tun season-ah goal 18 a khung tawh a. Nilaini zan pawhin English rawlthar duhawm hian Sheffield United tlar hnung tan hna a siam nasa a, ball pass ṭha tak tak a neih chu a ṭhiante'n an hmang ṭangkai lo.

Kum 21 a upa English forward Kane hi club tan tak takin an hmelhriat tawh. Nilaini zana 'rising star' erawh chu Sheffield substitute Che Adams a ni.

Kum 18-a upa Che Zach Everton Fred Adams hi England lamah chuan a lar viau tawh a. Non League club Ilkeston tana a khelh ṭumin match khat lekah scout 45 laiin a inkhel hi an thlir. English foward Adams hian Huddersfield Town, Peterborough United leh Crewe Alexandra te sawmna hnawlin nikum November thla khan Sheffield United a zawm.

Professional football minute 136 lek la khel chungin Fred Adams hian Premier League club Tottenham lamah goal hnih a khung a, English media lamin a chanchin sawi zui nuam an ti hle.

Eng nge an sawi?

Sheffield United manager Nigel Clough chuan, "Spurs anga team ṭha nen kan inbeih tawk avangin ka player-te ka chhuang a. Player quality an neih ṭhatna kha inkhel tidanglamtu chu a ni. Goal khat khan danglamna a thlen thei tih kan hria a, goal hnih kan khung hnuah goal thumna kan hlah hlauh. White Harte Lane-a kan chak loh khan pawi kan ti takzet a, kan khelmuala kan chak loh dan hi kan ui lehzual," tiin a sawi.

Goal pawimawh khungtu Eriksen chuan, "A hun takah goal ka khung a, minute 88 hnu lamah kha chuan ball min pe turin ka au nasa. Goal hnihna ka khung hma pawh khan kan chak loh ka ring lo, extra time khelh a ṭulah ka ngai chauh," tiin a sawi.

Kum 22-a upa midfielder chuan sawi chhunzawmin, "Sheffield United kha an khel ṭha a, Premier League team ang maiin an ṭha a ni. League One aia sanga khel tur an ni. Final-ah Chelsea kan tum dawn a, kan hlau lo. Anni nen hian record ṭha tak kan nei a, inrintawkna nen kan khel ang," tiin a sawi.

Spurs striker Hary Kane pawh ṭawng chhuakin, "Wembley-ah chuan engpawh a thleng thei. Tun season-ah vawi khat ve ve kan chak a, a ṭha zawk zawn nan chuan Wembley aia ṭha a awm lo," tiin a sawi.

Spurs boss Maurico Pochettino chuan, "Ka player-te'n Wembley-a khelh an phu a, supporter-te pawhin final thlen hi an phu a, ka lawmpui takzet a ni. Sheffield khan kan rin aia nasain pressure min pe a, hun tawp hma minute 10 chhung kha chu an hlauhawm takzet a ni," tiin a sawi.