Dons rawlthar Alli duhtu an tam

League One a khel mek MK Dons midfielder Dele Alli chuan tun thlasik transfer ah rimtu a ngah hle.

Kum 18-a upa Ali hi kum 16 a nih laiin MK Dons tana a game hmasa ber khel tawh a. A duhtu langsar zingah Premier League club Newcastle United an tel. MK Dons manager Karl Robinson chuan, " Tun season chu kan club tan a khel zo ang. Eng club pawhin lei dawn se kan inremsiamna tur chu tun season chhung chu kan hnenah a awm rih anga, nipui transfer hunah amah leitu club hnenah a kal chauh ang," a ti.

Alli hian MK Dons tan game 31 khelah goal 12 a khung thei a. Hemi chungchang hi sawi chhunzawmin MK Dons manager Robinson chuan, "Kum 18 leka upa ni chunga goal 12 khung thei Alli man hi a tlawm thei lo," a ti .

Alli hi England U-19 international a ni a, a club khelh mekna hian man tlawm taka chhuah tir an tum lo.