Atletico lakah Barca an him

Nilaini zan Barcelona leh Atletico Madrid te inkhel boruak a sang a, a hmuh­nawm bawk. Copa del Rey quarterfinal-ah goal nga lutin own goal leh penalty a awm bakah goal rang a awm bawk. Vicente Calderon-ah Atletico-in player pakuain chauhin hun tawp an thleng. Second leg-ah Barcelona 3-2 in an chak; aggregate-ah 4-2 in an chak.

Tunge khel?

Barcelona manager Luis Enrique-a'n first leg-a starting eleven bawk a hmang. Keeper-ah Marc-André ter Stegen awmin, tlar hnungte chu Jordi Alba, Javier Mascherano, Gerard Pique leh Dani Alves te an ni. 4-3-3 formation hmangin midfield-ah Andres Iniesta, Ivan Rakitic leh Sergio Busquets te an awm a, tlar hmaah South American trio Lionel Messi, Neymar leh Luis Suarez te an awm.

Atletico manager Diego Simeone-a'n hrem vanga chhawr theih loh defender Diego Godin-a aiah Uruguay tana Godin-a khelhpui Jose Maria Gimenez chu Miranda nena inkawp turin a luhtir. Defence sirah Juanfran leh Guilherme Siqueira te an awm a, keeper chu Jan Oblak a ni. Wing-ah Arda Turan leh Raul Garcia te an awm a, midfield laiah Gabi leh Mario Suarez te an inkawp. Tlar hmaah Antoine Griezmann leh Fernando Torres te an tlan dun bawk.

A goal mawlh mawlh

Inkhel ṭan aṭanga second 46-na lekah Fernando Torres-a'n Atletico tan a pet goal nghal a, 1-0 a ni. First leg-ah Barcelona 1-0 in an chak a, inkhel pahnih khaikhawm chuan an goal thun zat a intluk chiah.

Barcelona tlar hnung talbuai hma mah se tlar hma lama South American trio an buai ve lo. Minute 9-naah counter attack aṭanga Neymar-a goal hmangin Barcelona-in an siphurh an sut a, Suarez siam sak a ni.

Minute 28-naah Mascherano-a'n Atletico wing back Juan Fran a ti tlu a, penalty area pawn niin lang mah se referee Gil Manzan thutlukna chu penalty a ni. Penalty hi Raul Garcia-a'n cool takin a khung a, aggregate-ah 2-2 a ni chiah bawk.

Croatian midfelder Rakitic-a'n goal khung tur chu Gimenez-a'n dang hman mah se corner kick chu Atletico-in an chhuah tho; Busquets ball tauh chu Miranda-a'n an lamah ti lut. Own goal hi aggregate-a Barca hmahruaina a ni.

Minute 41-naah Alba handball vangin Atletico-in penaltyshout an nei a, referee-in penalty a pek loh zarah Barca-in counter aṭangin khualmual bika an goal thumna an khung. Goal dang luh belh loin first half a tawp, aggregate-ah 4-2 in Barca an chak.

Boruak a sang zel

Away goal rule a awm avangin Atletico-in chak turin second half-ah goal thum khung an mamawh. Amaherawhchu dressing panna kawngah Atletico captain Gabi chuan referee laka a kam tam zeuh avangin hnawhchhuah a ni.

Second half ṭan aṭanga rei loteah Turan beisei loh ang zawngin referee-in thutlukna a siam a, Turkish midfielder thimrimin a boot-in referee a vawm a, a tum a fuh lo.

Inkhel chawhnu lamah goal a lut tawh lo a, Messi-a'n Barca tan chance ṭha a hlah a. Atletico midfielder Suarez chu minute 84-naah hnawhchhuah a ni a, player pakuain Atletico-in a khel tluan a. Barcelona-in semifinal an thleng a, final thleng turin match khat bak an mamawh tawh lo.

Torres a phawi rang

Fernando Torres-a'n a club hlui Atletico tana a let hnuah goal rang tak vawi thum a khung tawh. Real Madrid an hneh ṭumin inkhelh ṭan aṭanga second 46-naah goal hmahruai a khung a, second half ṭan aṭanga second 35-naah goal a khung leh bawk.

Barcelona an hneh loh ṭuma a goal khung hi second 46-na a ni a, Torres hian Spanish club-ah harhtharna a chang mek.

Neymar faktu Enrique

FC Barcelona boss Luis Enrique chuan, "Ka team khelh dan zawng zawng kha ka lawm vek. Goal chhuah hma mah ila kan insiamṭha leh viau chuan ka hria. Kan che ṭha chho a, inrintawkna kan nei tawh bawk. Chutihrualin football-ah chu a danglam hlawk hlawk thei a ni," tiin a sawi.

Erique chuan Neymar fak zuiin, "Neymar hian ṭum dang ang bawkin inrintawkna nen a khel a, team tan a thawhhlawk takzet. Atletico lama a khelh dan kha a khelh dan hrim hrim a, tumahin an ti danglam lo ang," tiin a sawi.

Neymar sawiseltu Gabi

Halftime-a hnawhchhuah Gabi chuan, "Neymar hi a chak zawka an ṭan phei chuan ngeiawm takin a khel ṭhin. Tumahin chak loh kan duh lo a, field chhunga a chet dan hi hmuh hreawm ṭhin a ni," tiin a sawi.

Red card a hmuh chhan sawiin, "Atletico-in chak turin theihtawp kan chhuah a, referee kha thil tih dik loh ka hrilh a. Ka zah tawk loa ngaiin min hnawtchhuak ta a ni. Tihsual kan nei vek a, referee khan a tihsual a pawm tur a ni," tiin a lungawi loh thu a sawi.