FIFA President chuh hun a tawp Figo-a'n a hming a thehlut!

Portuguese footballer ropui an sawi apianga sawi hmaih ngai tawh loh tur Luis Figo chuan FIFA President a chuh ve dawn thu a puang a, nimin khan a hming a thehlut.

Luis Figo hi FIFA president ni tura hming pe lut parukna a ni. Portuguese legend hma hian Sepp Blatter,Jerome Champagne, Prince Ali bin Al-Hussein, Michael van Praag leh David Ginola te'n an hming an lo pe lut tawh a ni.

May 29, 2015 a thlan tur FIFA President chuh tur a hming pekluh hun hi nimin khan a tawp a ni.

Figo thukhawchang

Club inhal Real Madrid leh Barcelona tana khel kawp thei Figo chuan, "Football hi ka ngaihtuah em em a, tunhnai mai ni lo kum engemawzat liam ta te ka thlir kirin FIFA kal dan hi ka duh tawh lo a ni. Internet-ah FIFA chanchin zawng ila, kan hmuh hmasak ber chu hlemhletna a FIFA inhnamhnawih chungchang a ni. Mite'n FIFA an hmuh dan hi kan thlak danglam a ngai a ni," a ti

Portugal captain hlui chuan sawi chhunzawmin, "Football-a mi pawimawh tak tak, player, ma­nager leh federation-a president-te ka titi pui a. Anni pawhin thil thlak danglam ngai awmin an hre vek a ni," tiin FIFA kalphung chu a ṭhat tawk loh thu a sawi.

President chuh tur bihchianna

Sepp Blatter: Ṭum li lai FIFA President lo ni tawh hi kum 1998 khan a vawi khat nan FIFA President-ah thlan tlin a ni a; 2002, 2007 leh 2011 inthlanah te khan thlan nawn leh vek a ni.

Kum 78-a upa Blatter hi tunhnaia FIFA hmingchhiatna hrang hrang-ah sawisel a hlawh hle. A bik takin kum 2018 leh 2022-a Russia leh Qatar te World Cup thlen theih dan hi a dik tawk loah an ngai a, Blatter hi mawhphurtua ngaih a ni.

Jerome Champagne: Kum 11 chhung FIFA deputy secre­tary general ni thei a ni. French pachal hi kum 2002 FIFA presidential election-a Blatter thlan nawn a nih theihna chhan kha a ni.

FIFA tan Champagne hian kum 1999 aṭangin a thawk ṭan a, kum 2010-ah a chawlhsan. FIFA a chhuahsan hnu hian World Festival of Black Arts ah Football Commissioner hna te, Palestinian Football Federation leh Palestine Olympic Association ah Adviser hna te, Football Federation of Kosovo, Cyprus Turkish Football Federation (CTFA) leh Congolese football club TP Mazembe ah te adviser hna a thawk a. Football administration-ah sulhnu a nei ṭha hle.

Prince Ali bin Al-Hussein: Kum 39-a upa Jordan prince Prince Ali bin Al-Hussein hi FIFA Vice President nilai a ni a, mi tam takin FIFA President ni thei tura an beisei a ni.

Al-Hussein thlawptu zingah UEFA president Michel Platini pawh a tel a, hetih lai hian a chawr­chhuahna Asian Football Confederation thlawpna a hmu thung.

Prince Ali bin Al-Hussein hi West Asian Football Fede­ration-ah president a ni a, Jordan Football Association-ah president nilai a ni bawk.

Michael van Praag: Dutch FA president Van Praag president tura rinkai a ni lo a, UEFA vote ti phir tura rin a ni. Hei vang hian Blatter tan chuan a ding ve hi a lawmawm zawk hial ang.

Van Praag hian Ajax president hna kum 11 chhung a chelh a, a hunlai hian UEFA Cup, UEFA Champions League leh Intercontinental Cup -ah te Ajax hi an champion.

David Ginola: French International Ginola hi Tottenham Hotspurs leh Newcastle Unitted tan a khel tawh a. French Player of the year leh PFA Players' Player of the Year dawng tawh mah se FIFA president nih a tum hi khawvel mak tih a ni.

Luis Figo: Mipui rin loh takin Luis Figo a rawn lang a, ani hi World Player of the Year-ah ṭum hnih thlan a ni tawh. Kum 2009-a football khelh a chawlhsan hnuin administration-ah a inhmang chhunzawm a, UEFA Committee-ah member a ni a, a thawhpui te'n an fak hle.

Kum 42-a upa Luis Figo hi Africa leh Asia khawmualpuiah amah thlawptu a neih ṭhat avangin a chance a chhe lo ang.