Lammualah Under 19 I League

30th January, 2015

I League club inkhel kan hmu tawh a, Second Division I League thlengin Lammualah kan hmu tawh. Tuna kan hmuh leh tur hi chu I League Under 19 inkhel a ni a, Mizoramin a vawi khatna atan official I League match a thleng dawn e.

All India Football Federation chuan Under 19 I League inelna chu Aizawlah a nghat a, February 4 aṭangin Lammualah khelh ṭan a ni ang. Under 19 inelnaah chuan India ramah a sang ber a ni a, I League club-te kan hmu dawn.

Aizawlah hian Mizoram Premier League club pahnih Aizawl FC leh Chanmari FC bakah Shillong lama I League club pahnih Shillong Lajong leh Royal Wahingdoh-a an Under 19 team inkhel kan hmu dawn.

Chawhma dar 11 leh chawhnu dar 2-ah an inkhel ṭhin dawn a, inkhel hmuhnawm tak a ni hlawm ang. Shillong club pahnih hian Mizo player an kawl nual a, chuvangin Lammualah pawh an mikhual bik hauh lo ang.

Shillong Lajong

Shillong Lajong hi Mizo footballer-te tan club hlu tak a ni. India hmarchhak aṭanga I League khel thei hmasa ber an ni a, an kaina tura a thawhhlawkte chu Mizo player an ni hlawm.

Tun ṭumah hian India junior team-a khel ṭhin Isac Vanmalsawma, Hnahthial leh Lalrammmuana, Ramthar Veng-te bakah Samuel Lalmuanpuia, Zemabawk North-te an rawn hruai ang.

Isaac leh Rammuana-te hi I League squad-ah tel tawhin senior team-ah pawh an khel tawh a, Rammuana hi chuan Federation Cup-ah pawh goal-te a thun tawh a; nimahsela an la naupan avangin Under 19 team-ah hian an khel dawn a ni.

Royal Wahingdoh

Shillong Club pakhat zawk Royal Wahingdoh hi Aizawlah an mikhual lo a, tuna I League-a an kai theihna tur hian Lammualah an rawn chak a nih kha. He team hian Mizo player paruk vel zet an rawn hruai a rinawm a, an senior team lamah pawh Mizo an kawl nual a ni.

Royal Wahingdoh-ah hian Vanlalzuia, Lalmuanzuala Khiangte, PC Lalhruaitluanga, Lalruatkima, Jerry Zonunsanga leh R Lalhmangaihzuala-te an awm dawn a, anni hi hnam dang player-te tan pawh 'home' lama khel tur an nih avangin innghahna tham an tling ang.

Aizawl FC

Aizawl FC hian kum tluanin I League Under 19 tur hi an urlawk a, ADFA First Division team neiin tun hnaia tournament-ah pawh an champion a; Champhaia neih MFA Cup 2014-ah pawh finalist an ni.

Player ṭha tak tak an kawl bakah Under 19-a la khel phak tur player dang an lak belh nual a, chuvangin team ṭha tak an ni. Hun rei tak chhung an inbuatsaih tawh a, an fitness a ṭha a, an senior team-te MPL-a an champion-in a tiphur zual a ni.

Chanmari FC

Mizorama football club ṭhangduang leh fans nei ṭha ber zinga mi Chanmari FC hian a vawi khatna atan Under 19 I League an khel dawn a, an phur khawp mai.

Chanmari FC hi season hnih chhung MPL Under 17-a champion tawh an ni a, Mizo rawlthar ṭha eng emaw zat hi an kawl khawm sa a ni. Hei bakah hian Subroto Cup khela zin Mizo rawlthar ṭhate an la khawm a, MPL-a kan hmuh ṭhin Under 19-a la khel rual player an la nual. Fans an nei ṭha bawk a, beiseina sang tak nen an khel ngei ang.

Lammuala inkhelh hun

4 February 11:00 AM Shillong Lajong vs Chanmari FC

4 February 2:00 PM Aizawl FC vs Royal Wahingdoh

7 February 11:00 AM Aizawl FC vs Shillong Lajong

7 February 2:00 PM Chanmari FC vs Royal Wahingdoh

11 February 11:00 AM Royal Wahingdoh vs Shillong Lajong

11 February 2:00 PM Aizawl FC vs Chanmari FC