Australian Open Hmeichhe final-ah mipui hmuh chak Sharapova vs Serena
Australian Open hmeichhe semi final an khel zo ta a, result danglam thleng a awm hran lo. Mipui beisei ang ngeiin Maria Sharapova leh Serena Williams te'n awlsam takin an tumpuite an hneh ve ve a, final-ah an intum dawn ta a ni. Hei hi a hmuhnawm ang.
Serena tan Champion a hnai
Kum 19 a upa Madison Keys-i'n Serena Williams barakhaih a tum zanah a hlawhtling zo lo. Grand Slam tournament a khelh tawha a tawn san ber ṭum tawng mek Keys tan Serena hi a ṭha mah mah a, darkar khat leh minute 24 chhung lekin 7-6 (7-5) 6-2 in Grand slam a vawi 18 champion tawh Serena hian a hneh a ni.
World no.1 Serena chuan a tumpui kum 19 mi lek Madison Keys chu a fak a, "Reilote-ah he tournament-ah hian a la champion ang. Grans Slam title tam tak la turin theihna a nei a ni," a ti. An inkhel thlir kirin Serena chuan, "Set khatnaah phei kha chuan min nawr na hle a, nawr let tur khan theihtawp chhuah a ngai a ni, " a ti a, a tumpui Keys chu a fak hle.
Keys hian a final kalkawng-ah seeded 4 na Petra Kvitova a hneh a, quarter final-ah Venus Williams hneh lehin mipui rin loh takin Australian Open-ah hian a rawn par chhuak a, world no.1 Serena meuh chu a hneh zo ta lo a ni.
Khin rual loh Sharapova
Australian Open-ah world no.2 Sharapova a kal zel a, final lut tura a beihna kawng-ah a tumpuite'n hna hautak an siam hleithei lo. Sharapova hian vawi ruk an intum hnua a vawi rukchakna turin a hnampui, Russian nula Ekaterina Makarova chu 6-3 6-2 in harsa lo takin darkar khat leh minute 27 chhungin a hneh a ni.
A vawi 10 na atana Gran Slam final khel tur Sharapova chuan, "Ka tum tur chu tupawh nise, a lakah record nei ṭha lo hle pawh ni ila, inrintawkna nasa tak nen final ka hmachhawn dawn a ni," a ti.
Vawi 18 an intum tawha vawi hnih chiah a la hneh theih Serena hi hneh a tum hle. An final khelh tur thlir lawkin Sharapova chuan, "Tunhma kan result hian
ṭangkaina a nei lo a, ka phu vanga final khel tur ka ni a, hnehna chang ngei turin ka theihtawp ka chhuah dawn a ni," a ti bawk.
Chak lo zawk Ekaterina Makarova chuan, "A game ai mah chuan rilru lam kha ni ber zawkin ka hria. Australian Open final khel thei tura inrintawkna ka tlachham niin ka hria, " a ti a, mahni inrintawkna a nei lo chu a tawrh thu a sawi.