Murray-a'n final a lut

British mipui ṭan rawn Andy Murray-a'n amah ṭantute beiseina a tithlawn lo. Inkhel ṭan tirah khel chhe deuh mah se Australian Open-ah final lut turin 6-7 (6-8) 6-0 6-3 7-5 in quarter final-a Rafael Nadal hnawt chhuaktu Tomas Berdych a hneh. Vawiin tlai dar 2:00 hian Novak Djokovic leh Stanislas Wawrinka te in tum dawn a, heta chak zawk nen hian final-ah a hmachhawn ang.

Inkhelh zawhah a vawi riatna atana Grand Slam final khel tur Andy Murray chuan an inkhel thlir kirin, "Set khatna ka hloh kha chuan ka hnual hman a, mah se set hnihna kan khelh ṭan leh chiah khan ka theihtawpin ka nawr a, kan inkhelh chhung zawng khan kha kha chhunzawm ka tum a ni, " a ti a, a chak chu a hlim hle.

Mens double results

Mens double lamah pawh final khel tur a chiang tawh a, semi final pakhat zawkah French mi ve ve Pierre-Hugues Herbert leh Nicolas Mahut te ṭangkawp chuan Croatia tlangval Ivan Dodig leh Brazil lam chhuak Marcelo Melo te chu 6-4 6-7 7-6 in an hneh.

Final-ah Jean-Julien Rojer/Horia Tecau (Netherlands/Romania) te ṭang dun 6-4 3-6 6-3 a hnehtu Italian mi ve ve Simone Bolelli leh Fabio Fognini te inkawp an hmachhawn dawn a ni.

Womens double results

Bethanie Mattek-Sands leh Lucie Safarova (United States/Czech Republic) te ṭang dun chuan chau lutuk loin final an lut thei. An tumpuite hi Julia Goerges leh Anna-Lena Groenefeld (Germany) te an ni a, inkhelh zawh hmain Groenefeld a inhliam avangin an in hnukdawk a ni.

Semi final pakhat zawkah Chan Yung-Jan/ Zheng Jie (Chinese Taipei/ China) te ṭang dunin Michaella Krajicek/ Barbora Zahlavova Strycova (Netherlands/ Czech Republic) chu 6-3 6-2 in an hneh.