Real-in United keeper chuhpui

Tun hnaia media report-ah David De Gea chanchin inang lo tak tak a awm. Manchester United goalkeeper hian Old Trafford-a châm chhunzawm turin a rukin contract a ziak tawh ti an awm a; Real Madrid-in khawvela goalkeeper hlawh tam ber leh man to ber ni tura lei an tum tih report a awm bawk.

Kum 24 mi goalkeeper hian United-ah kum nga dang khel turin contract a ziak tih chu Nilaini khan chanchinbu hrang hrangin an tarlang a; nimahsela Ningani lam khan United keeper hi Real Madrid-in lakluh tumin an la dawr zel niawmin an sawi bawk.

Atletico Madrid goalkeeper hlui hi Real lamin an sawm tih thuthang a awm meklaiin a agent Jorge Mendes chuan chhuak mai tur niawm takin a lo sawi ve bawk a, "United player a ni a, he club-a rei tak khel turin contract a nei; nimahsela thil hi chu minute nga dan leka inthlak vek thei a ni," a ti zauh a ni.

De Gea agent Jorge Mendes hi 'super agent' an tih hial khawpa player kaihruai hraw thei a ni a, a player enkawl zingah De Gea, Angel Di Maria, Cristiano Ronaldo leh Radamel Falcao-te an tel. United-in Mendes-a naute zinga mi striker Falcao a ngheta lei an tum tak si lohah chuan Mendes hian De Gea hi Real Madrid a lo zawrh niin thuthang a awm ve leh bawk a, Mendes hi Real nen inkungkaihna thuk tak neia ngaih a ni.

Chanchinbu ṭhen­khatin an tarlan dan chuan United hian an keeper hi contract thar ṭha zawk ziahpui tumin an dawr mek a, khawvela goalkeeper hlawh sang bera siam hi an inhuam ve tho. Manchester City keeper Joe Hart hi keeper hlawh ṭha pawl niin kar khatah pound 1,20,000 vel a hlawh a, United hian Hart-a hlawh aia tam hi pek an inhuam a, kum 2020 thleng khel turin De Gea hi thlun beh an tum niin an sawi.