Ṭahlai bang rawh Neymar!

Champions League final inkhel tawpna hamrik a ri a, Bayern player-te hlimna chu thua sawifiah chi a ni lo - a ṭhen an ṭhingṭhi a, lawm avangin kut an phar chhuak a, a ṭhen an tlan kual chiam a!

Chutiang boruak karah chuan mipui tam tak mit fukna pakhat a awm a, a hming chu Neymar a ni. Khawvela footballer manto ber hian khelmual pawh chhuahsan thei loin a mittui a dang zo lo a, patling a ṭap a ni. 

Bench-a pan hnu thlengin a mittui a luang a,  Neymar tan chuan a 'na' a ni - Lionel Messi hliahkhuhna ata tal chhuah duhin a hmangaih hmasa Barcelona a chhuahsan a, mahse a beisei ang ropuina erawh vawiin thlengin pekin a la awm lo. 

Ni e, "The beautiful game," tih hiala a hming an pek infiamna hian a nunrawn a chhuah chang chuan ṭahpui tham a ni a, a chunga Linkin Park hla kan tarlan ang mai khian theihtawp chhuaha beihna pawhin a tawpah chuan awmzia a neih loh chang a awm ṭhin. 

Neymar-a'n Barcelona tana a khelh laiin nomawi chawi theih zawng zawng a chawi a, match 186-a khelhsakah goal 105 lawih a khungsak a, assist vawi 77 a nei bawk. 

Brazilian forward hi 'Lal fapa' ang maia duat a ni a, a kar khat hlawh ringawt pawh mi tam tak tan chuan dinchhuahna tham a ni. Mahse, Neymar hian Barca-ah thil kim lo awmin a hre tlat - chu chu mimal ropuina a ni. 

Barcelona-in hlawhtlinna an chan apiangin Messi chu Lal ang maiin chawimawiin a awm ṭhin a,  Neymar erawh indonaa che ṭha tak sipai 'pakhat' ve ang lek mai a ni - hei aia ropui zawk nih a duh.

Sum tam tak nen PSG an lo lang a, Barca-a a hlawh aia tam an tawk tarh a, Barca phalna zat pound maktaduai 200-in an la lei ngam tak tak zui! Neymar-a'n phur takin a puanthuah a tel a, Paris lamah a pem. 

Neymar-a'n Pathianni zan thleng khan PSG tan inelna hrang hrangah match 85 khelin goal 70 a khung tawh a, assist vawi 41-a nei bawk - mimalin a tih tur ang chu a ti vek tihna a ni. 

French football-ah nomawi chawi theih zawng zawng a chawi a, mahse kim lo erawh a la awm. Messi leh Cristiano Ronaldo-te nen huang khata dah tur chuan Barca-a a hlawhchhuah tawh hnu Champions League nomawi hi PSG jersey ha chunga a chawi a ngai. 

PSG-in Neymar an lei chhan tak pawh hi Champions League an duh vang tiin a sawi theih a, Neymar tel lo pawhin tualchhung league chu an thunun - tun season tih lohah hliam vangin Champions League knockout round-ah a team a pui thei lo ṭhin a, a puih theih hunah final hruai thleng nghal mah se nomawi erawh a tel ta lo. 

Covid-19 vangin Ballon d'Or sem ṭhulh ngat lo phei se chuan Robert Lewandowski nen Champions League nomawi chawi zawk chu khawvela footballer ṭha bera thlan tura ngaih an ni a, engkim chu mitkhap kar lekin a thamral ta.

Neymar hian inkhelh ṭan hma khan 'speaker' keng chungin stadium a pan a, inkhelh zawh huna champion lawm nana a ken tel ni ngeiin a lang - a tawpah erawh rilru nat vangin a mittui a tla a, fan-te hnenah ngaihdam a dil. 

Kum 28 mi forward chuan, "Infiamna khawvelah chuan chak lo zawk kan awm a ngaih chang a awm tlat si. Min thlawpna leh duhsakna zawng zawngah lawmthu ka sawi a, Bayern, ka lawmpui che u a ni," a ti. Neymar hi tun season ṭan dawn khan Barcelona nen nasa taka sawizawm a ni a, a lung a len bawk avangin Nou Camp lamah hian kir leh mai tur anga sawi thawm a ri ring ṭhin hle. 

Champions League final titi a reh ang a, transfer bazar-ah thawm hriat tur a awm ṭan leh ang. Neymar hian European champion ni loin PSG a chhuahsan dawn nge, Barca-ah a kir ang, tih te chu titi an ni leh thuai ang. 

Barcelona-ah Lionel Messi a lungawi lo tih hi thu thar a ni tawh lo a, kum 33 mi forward hian club thuneitute hnenah chhuah dilna a thehlut dawn nia sawi thawm hial a awm tawh. Hetiang boruak karah hian Paris St-Germain chu Messi nen sawizawm an ni a, mahse PSG boss Thomas Tuchel chuan Argentine forward chu Barcelona-a a cham a rin thu a sawi. 

German coach chuan, "Tu coach-in nge Messi duh lo ang? Mahse, Messi hian Barcelona-ah a career a hman zawh ka ring a, amah hi 'Mr. Barcelona' a ni," tiin a sawi. Spanish football expert Guillem Balague chuan Messi hian tun ang em em a Nou Camp chhuahsan a la hnaih ngai loh thu a lo sawi tawh - Messi hian Barca tan match 731-ah goal 634 khungin Champions League (4) leh La Liga (10)-ah a champion pui tawh a, Ballon d'Or vawi ruk a dawng tawh bawk. 

Tuchel chuan, "Transfer chungchang sawi hun a la ni rih loah kan ngai. Ni rei loteah kan la sawiho ang a, hnathawh tur tam tak kan nei dawn a ni," a ti. PSG boss chuan sawi zawmin, "Season ṭan dawnah player kan chan nual a, tunah contract hman zawh vangin Thiago Silva leh Eric Maxim Choupo-Moting-te kan chan leh dawn bawk. "Squad tichhah turin transfer hun hi kan hman thiam a ngai ang. Chawlh a tam dawn loh avangin season thar hi a hautak dawn a, squad chhah tak din a ngai a ni," a ti. French league sang ber Ligue 1 chu khelh ṭan a ni leh tawh a, August 29 zanah khuan PSG pawhin season thar ṭan turin Lens an lenchilh nghal ang. 

PSG-in Neymar leh Kylian Mbappe man atan ringawta an sen belhkhawm chu pound maktaduai 362-a tling a, European football-a top club tam tak squad pumpui man aiin a to zawk. French club chak zawh loh chhanah pawh player pahnih hian kawh rawn an hlawh bik a, mahse Tuchel chuan a player pahnih chu chhanin team tana an thawhhlawk thu a sawi. 

Tuchel chuan, "Neymar hian tournament duhawm tak a hmang a, thil zawng zawng a ti vek thei bik lo a ni," a ti a, July-a hliam a neih hnua inlan thei Mbappe fak zuiin, "A ke rek hliam na tak ngaihtuah chuan final a khel thei pawh hi a mak zawk," a ti. PSG midfielder Marquinhos pawhin a ṭhiante hi chhanin, "Team kan ni a, mimal tihsual a ni lo," a ti - Mbappe hian tun season-ah match 37 khelin goal 30-a khung a, assist vawi 19 a nei bawk. Kum 21 mi forward chuan, "Kan duh dana season kan khar lo hi a pawi kan ti a, mahse hei hi hringnun chu a ni miau si. Kan theihna zawng zawng nen kan bei a, Bayern ka lawmpui a ni. In mi thlawpna zawng zawngah lawmthu ka sawi e," tiin social media lamah a tarlang.