Premier League Preview Liverpool tan Sturridge a inlan dawn?
Zaninah English Premier league an khel dawn a, club lian te an inlan kim dawn hle.Liverpool in zanin dar 7:00 ah an khelmual Anfield ah West Ham United an lo mikhual dawn a, thla nga chhung inhliam vanga inkhel tawh lo Daniel Sturridge a dam leh tawh avangin a khelh theih dawn leh dawn lohin fans te rilru a luah. A khel thei a nih ngat chuan League Cup semi-final a Chelsea hneh loh vanga ngui mek Liverpool tan a ṭangkai khawp ang.
Season hmasa Premier League a match 29 a khelha goal 21 khungtu Sturridge hi Luis Suarez chhuah hnuin Liverpool innghahna ber tur a beisei ni mahse hliam in a tibuai a, tun season ah match thum chiah la khelin goal khat a khung.
Sturridge inhliam chhung hian Liverpool in goal khung an harsat a, beiseina sang tak nena AC Milan aṭanga an lak Mario Balotelli lah in beisei a phak lo a, Premier League match 12 a khelh tawh ah goal a la khung lo. Liverpool striker zinga goal khung hnem ber Rickie Lambert-a'n goal thum a khung!
Daniel Sturridge chuan, " Inkhelh leh thuai thuai ka chak tawh khawp mai, training na ah theihtawp ka chhuah a, inkhel tura min tih hun huna inkhel turin ka inpeih tawh a ni," a ti a, a malpui hliam vanga rei tak a chawlh chhungin thil tam tak a zirchhuah thu leh a hliam chuan hmasawn tura a puih nasat thu a sawi bawk a ni.
Liverpool manager Brendan Rodgers chuan, " Training na ah a ti ṭha in a thawkrim thei em em a...ka titi pui anga, hma a sawn dan te kan en phawt ang. Tunah hi chuan a hlim in a chak ṭha leh tawh em em a, a ṭhat theih dan berin a awm leh tawh a ni," a ti a, Sturridge dam ṭhat tawh thu a sawi.
Harhtharna chang Liverpool
Tunhnai Premier league match ruk an khelha chak loh la tawng lo Liverpool khelmual a len luh hi West Ham tan thil chakawm a ni lo ang. Season chawhma lamah Liverpool hian beisei phak lo mahse tunhnai ah harh tharna an chang a, an khel a hmuhnawm thei hle. Tlar hma lamah an striker Rickie Lambert leh Mario Balotelli te'n beisei phak lo mahse Brazilian Philippe Coutinho leh English rawlthar duhawm Raheem Sterling te an neih avangin West ham tlar hnung tan anni pahnih hi buaipui tham an tling ang. Tunhnaia inkhel chau captain Steven Gerrard aiah Adam Lallana a luh a rinawm a, African Cup of Nation khelh vanga thangbo mek Kolo Toure aiah Dejan Lovren chu lut tura rin a ni. League Cup semifinal Chelsea nen an khelh ṭuma hliam tenau turartu Mamadou Sakho chu a fit hman beisei a ni bawk.
West Ham lamah Liverpool duh loh hnu Andy Carroll leh Stewart Downing te hi an players ṭangkai tur annih hmel a, tunhnai ah hemi te pahnih hi an che ṭha thei hle. Tun season ah an pahnih inkawp hian goal 10 an khung tawh a, Downing bik hian a ṭhiante goal thun tur vawi sarih a siamsak tawh bawk.
Season ṭan tirah West Ham hian an home ah Liverpool 3-1 in hneh mahse tunhnai a Andfield an len luh vawi 13 ah 'Hammers' hian vawi khatmah hnehna an chang zo lo.
Man Utd. hneh nawn tumtu Leicester
Nikum September thla khan King Power Stadium-ah Manchester United an leng lut a, an beisei loh result nen an haw. Inkhel ṭan tir lamah United in 3-1 laiin hma hruai mahse, an defence khawng loh an tuar a , goal an sut zawh tir vek mai bakah 5-3 in an tlawm hial a, khualmualah an mualpho.
Zanin dar 7:00 ah Old Trafford ah Leicester an leng lut ve thung dawn a, Man Utd. tan mualpho nawn a thiang tawh lo. Leicester City hi tunhnai ah an chak hleitheilo a, an match hnuhnung 13 ah hnehna an chang zo lo vek! Tunah hian Premier League table-ah a mawng berah an awm mek.
United tan Ashley Young chu hliam vangin a khelh theih a rinawm loh a , Leicester lamah inhliam vangin Chris Wood an chhawr thei dawn lo a, Africa Cup of Nation khel a thangbo mek Riyad Mahrez an chhawr theih hmel loh bawk.
Arsenal an kal zel
Etihad stadium ah Arsenal in champion lai Manchester City 2-0 in an tlawm a, FA Cup lamah Premier League club lian dang chak zo lo mahse Arsenal erawh an chak a, Brighton and Hove Albion 3-2 in an hneh a, an puja fuh lai tak a ni. Pathianni tlai dar 5:30 ah an inkhel ang.
Manchester United aṭanga an lak luh Danny Welbeck hian Premier League a Aston Villa a hmachhawn hnuhnung vawi thum ah goal li a khung a, Aston Villa striker Christian Benteke chuan Arsenal a hmachhawn vawi li ah goal thum a khung tawh bawk.
Aston Villa hian match nga chhung a zawnin goal an khung tawh lo a, Arsenal an tum huna an khung lo leh anih ngat chuan an club history a goal an khung loh rei ber ṭum an tawng dawn a ni.
Arsenal player thar Gabriel Paulista chuan Aston Villa an tum hunah a club thar tana a match hmasa ber a khelh a rinawm a, Aston Villa tan inhliam vanga a chawlh hnuin Fabian Delph a lo kir leh tawh dawn bawk.