Vawiinah sang pali hriat dawn Tuikual South hnung zuitu Chawnpui VR4

Mizoram Super League tawp ni a ni a, a hmuhnawm tluang zel. Nimin khan Zarkawt Recreation Center-a inkhelah Tuikual South-in an khingpui Chawnpui VR4 78-63 in an hneh a. Inkhel dangah KK Basketball Club-in Hollow BBSB chu 82-77 in an hneh ve bawk.

Chak la nei lo Hollow-in pahnihnaa awm Chawnpui an um phak thei tawh lo a, VR4 hian Tuikual South hnung zuiin semifinal an lut.

MSL-ah Tuikual?

Tuikual South-in coach leh player ni kawp KC Lalliantluanga enkawlna hnuaiah league stage an chak fai vek a, captain F. Zodinthara leh Rakesh te chu an player pawimawh an ni.

Semifinal-ah an hneh hnu bawk an tum leh dawn a, ṭum hnih dang an chak leh chuan MSL an khel ang.

Tling thei, tla thei

Table mawngphaha awm Hollow BBSP-in tling turin midang kutah an innghat lo. Samuel Lalthlamuana kahhruai team hian Bethlehem an hneh chuan MSL an khel thei dawn a ni.

Bethlehem hi tla thei an ni a, chak loa an tling a nih chuan semifinal-ah Tuikual an hmachhawn dawn. Chumi pumpelh tur chuan RL Famkima, Tinku Singh leh Lalhmachhuana te chet ṭhat a ngai dawn a ni.

Inkhel hmasa zawkah Bethlehem an chak chuan a hnuhnung zawka khel tur KK Basketball-in semifinal an lut tawh dawn tihna a ni. Semifinal khel tur hriat tawh nimah se inkhel erawh a pawimawh tho dawn. A chak zawk hian Tuikual South an pumpelh theih avangin inkhel hmuhnawm tak a la ni fan ang.

MSL Playoff inkhel en man hi Rs 20 a ni a, inkhel hmuhnawm en duh chuan Babutlang pan mai tur a ni.