Paul Pogba-a'n Juventus chhuahsan dawn - Agent

Juventus midfielder Paul Pogba agent Mino Raiola chuan kum hnih chhungin French midfielder chuan Juventus a chhuahsan tur thu a sawi.

Raiola hian Gazzetta dello Sport a hrilh danin tun kum chhunga Paul Pogba a insawn loh chuan nakkumah chuan a insawn chhuah ngei tur thu a sawi.

Pogba agent chuan, "Season tawpa player lian tham lei tur awm­chhun chu Pogba hi a ni. Cristiano Ronaldo, Lionel Messi leh Zlatan Ibrahimovic te hi an club-ah an nghet a, lei chhuah mai theih a ni lo ang. Chuvangin Pogba hi lei theih awmchhun tur chu a ni," tiin a zuar thiam hle.

French midfielder hian kum 2012 khan Manchester United aṭanga pound 800,000 lekin Juventus a sawm a, hetiang zat lek hi chu a ni tawh lo ang. Raiola chuan, "Pogba duh hi an awm a nih chuan pound maktaduai 100 tal sen an inhuam a ngai ang," a ti.

Tun dinhmuna khawvel player manto ber chu Real Madrid forward Gareth Bale a ni a, pound maktaduai 85.3 man a ni. Raiola thusawi hi a thleng dik a nih chuan Pogba hi khawvel player manto ber tur a ni. Tun season-ah Pogba hi Juventus tan vawi 26 a inlan tawh a, goal riat a khung tawh.