Ṭhumvawr hmangin Mali an chak

African Cup of Nations-ah ṭhumvawr hmangin quarterfinal lut tur zawn a ngai a, Malabo hotel-ah ṭhumvawrna hun neih niin Mali aiin Guinea an vannei zawk.

Vannei taka Group D pahnihna dinhmun hauhtu Guinea hian Pathianniah Group C pakhatna Ghana an hmachhawn ang.

Ṭhumvawr hi African Cup-ah neih a lo ni tawh a, kum 1988 khan a vawi khatna atan Algeria-in ṭhumvawr hmangin Ivory Coast an hneh. Tun ṭumah hian Ivory Coast hi Group D hmahruaitu an ni.

Group intluktawk

Group D-a team awm Ivory Coast, Guinea, Mali leh Cameroon te an inkhel tawk vek a. Vawi hnih inkhel kual zawhah point hnih ṭheuh an hmu a, inkhel result hi 1-1 vek a ni.

Group match hnuhnung berah Ivory Coast hian 1-0 in Cameroon an hneh a; Guinea leh Mali te 1-1 bawka an inhnehtawk avangin tehna hrang hrangah team pahnih an intluk vek a - ṭhumvawr neih a ngai ta a ni.

Ṭhumvawr chu

Ningania ṭhumvawrna hunah hian Guinea leh Mali aiawh pakhat ve ve an awm a. Mali football association president Boubacar Diarra-a'n a pawt hmasa zawk a, an tling zo ta lo.

Chak tur nemnghet nan financial director of the Guinea sports ministry Amara Dabo chuan a pawt ve leh a, hetihlai hian Diarra chuan mittui nen a lo thlir.

An sawi zui zel

Mali international hlui Frederic Kanoute chuan, "Ṭhumvawr hi chu sports a ni tawh lo. Guinea erawh ka lawmpui a, chak zel turin ka duhsak," tiin tweeter-ah a ziak.

Kum 37-a upa Kanoute hi hi Premier League club Tottenham leh West Ham tan pawh a lo khel tawh a ni.

Guinea coach Michel Dussuyer chuan, "Ṭhumvawr aṭanga tlak kan phu loh ang chiahin Mali hian hetianga tlak hi an phu lo," tiin a sawi.

Mali boss Henri Kasperczak chuan, "Tling tur zawnna hi ṭhumvawr lo deuh kan hman a ṭul a ni," tiin dan thar a ṭul thu a sawi.

CAF media director Junior Binyam chuan, "Inelna ṭan tirha dan chu kan ti danglam thiang lo. Chutihrualin dan ti hmasawn zel turin ngaihtuahna kan sen a ṭul thung. Football result chu field chhungah chinfel tur a ni," tiin a sawi.

Knockout stage

African Cup-ah league stage khelh zawh a ni tawh a; Congo, Congo DR, Tunisia, Equatorial Guinea, Ghana, Guinea, Ivory Coast leh Algeria te'n quarterfinal an lut.

Nizan aṭang khan quarterfinal hi khelh ṭan a ni a; final hi February 8, Thawhṭanni zana khelh tur a ni.