Stamford Bridge-ah Lampard a kir dawn

Frank Lampard-a'n Chelsea lamah goal a khung a, Etihad Stadium-ah Manchester City leh Chelsea te 1-1 in an inhnehtawk. Inkhelh banah Jose Mourinho chuan, ""Frank Lampard hi Man City player a ni tawh. Kan elpui tur team-a kal a thlang a, chuvangin kan inkungkaihna a tawp tawh," a ti.

Zanin dar 11:00 hian Chelsea-in an khelmual Stamford Brige-ah Manchester City an mikhual dawn a, Blues supporter-te'n an player ropui ṭhin Lampard an lo chhawn dan tur hi khawvel hmuh châk a ni.

Title fight?

Chelsea hi Premier League hmahruaitu an ni a, point 52 an hmu tawh. Manchester City nen an inkarah point nga a awm.

City hian khual-mualah point an hlawh chhuak lo a nih chuan Chelsea hi point riatin an fâl dawn a, chelh an harsa tawh ang.

Spain Duo Out?

Diego Costa-a'n Chelsea a zawm hnuah yellow card vawi riat a hmu tawh a, red card tur ṭum thum vel a pumpelh tawhah an ngai. Liverpool player Emre Can a rah luih vangin hnawhchhuah ni lo mah se replay-a en zui hnuah hrem a ni ta tho. Match thum hrem tur Costa hi zanin aṭanga hrem ṭan tur a ni.

Premier League top scorer ni mek goal 17 khung tawh Costa hian City a hmachhawn thei ve dawn lo. Spanish midfielder Cesc Fabregas chu Liverpool nena an inkhel ṭumin inhliam vangin lakchhuah a ni. Ani bakah hian Branislav Ivanovic leh Felipe Luis-te dinhmun a chiang lo.

Manchester City-in African Cup vangin an player thar Wilfried Bony bakah midfielder pawimawh Yaya Toure an chhawr thei dawn lo.

City tana thu lawmawm chu an tlar hma zinga hriam ber Sergio Aguero a khel thei dawn. Argentine forward hian Premier League-ah goal 14 a khung tawh a, ani aia khung tam chu Costa chiah a awm.

Fapa tlanbo Lampard

Mourinho-a'n Lampard-a chungchangah ṭawng­kam duhtui lo mah se Stamford Bridge-ah Blues supporter-te'n ṭha taka an dawnsawn rin a ni.

Chelsea Supporters Trust chairman Tim Rolls chuan, "Tumahin Lampard hi an boo ka ring lo," a ti.

Chelsea-ah Lampard hian a vanglai a hmang a; Russian pa hausa Roman Abramovich pawisa, Jose Mourinho thluak leh Lampard-a thiamnate hi Chelsea-in tun dinhmun an thlen theihna chhan a ni.

Lampard hian Chelsea hi Premier League-ah vawi thum, FA Cup-ah vawi li, League Cup-ah vawi hnih, FA Community Shield-ah vawi hnih a champion pui a, UEFA Champions League leh UEFA Europa League-ah vawi khat ve ve a champion-pui bawk.

Chelsea player pawimawh a ni tih nem nghettu chu a mimal record hi a ni. Kum 2005 khan FIFA Player of the Year leh Ballon d'Or-ah Silver Award a dawng. Hemi kum vek hian PFA Fans' Player of the Year-ah thlan a ni.

Lampard hi Chelsea tana goal khung hnem ber niin goal 211 a khung. A hma chiaha record goal-scorer leh Bobby Tambling bakah captain John Terry-te'n Chelsea player ropui berah an ngai. Fans-in an la lawm reng em tih erawh zaninah a chiang ang.

Player pawimawh

Nemanja Matic-a'n Chelsea tana a khelh hmasak zawk ṭumin hlawhchham mah se ṭum hnihnaah erawh player pawimawh a ni. Serbian midfielder palian hian Blues tana vawi 32 a inlanah vawi khat chiah a chak lohpui. Ṭum dang ang bawkin zanin hian Matic hi team khaipa a nih a rinawm.

Arsenal legend Thiery Henry-a'n Spanish midfielder David Silva chu Ma City player ṭha ber tiin a sawi. French forward thusawi hi ṭawmpuitu an tam ang, Silva hi Chelsea tlar hnung ṭhiat thei tur a ni ngei ang.

Mourinho v Pellegrini

Kum 2010 khan Portuguese manager Mourinho hian Chilean manager Manuel Pelligrini thlakin Real Madrid a enkawl ṭan. Khata ṭang khan manager pahnih inkarah hian boruak a awm ṭan. Premier League club an enkawl hnuah an inkar boruak hi a sang zui zel.

Chelsea manager Mourinho hi FA-in December thlaa a ṭawng­tam hret avangin pawisa an chawitir a, a player pawimawh Costa an hrem leh bawk avangin a lungawi lo. Nimin khan Portuguese manager hian media a hmachhawn duh lo a, a assistant Steve Holland pawh a kaltir chuang lo.

Man City boss Pellegrini chuan, "Team ṭha tak ni chung siin club tê ang maiin goal venhim hna pui berah an nei," tiin Mourinho-a'n Chelsea a khelhtir dan chu a lo sawisel tawh a, an inngaisang lo hle!

Inrinni zan inkhel tur sawiin Pellegrini chuan, "Ka hlauthawng a ni. Chelsea vanga hlauthawng erawh ka ni lo. Kan khelmualah ṭum hnih goal kan khung tawh lo a, kan inkhel hnuhnung match nga zinga match liah goal hnih chiah kan khung bawk. Tlar hma leh tlar hnungah harhtharna kan mamawh," tiin a sawi.

Zanin hi champion inchuhna anga ngaih a ni a, City an chak loh chuan Chelsea hian champion nomawi an ban phak tawh hialin a rinawm.