Australian Open: Champion lai Wawrinka hnehtu Djokovic final a lut

Australian Open final-ah mipui in an hmuh chak final an hmu dawn - world no.1 Novak Djokovic leh Andy Murray an intum dawn. Nimin khan Djokovic hian champion lai Stanislas Wawrinka chu 7-6 (7-1) 3-6 6-4 4-6 6-0 a hnehin final a lut.

Djokovic leh Murray hi Australian Open final-ah 2011 leh 2013-te khan an lo intum tawh a, Djokovic chu a chak zawk ve ve.

Inkhelh zawhah seeded no. 1 Djokovic chuan, "Inkhel harsa tak hmachhawn turin ka inbuatsaih a, inbeihna ropui tak niin ka hria," tiin an inkhel chu a thlir kir a, "Theihtawp chhuahin kan innawr tawn a, tournament ropui tak a khelh avangin Stan hi ka lawmpui a ni," a ti a, a khingpui chu a fak hle.

Final-a Andy Murray nena an intum tur chu thlirlawkin Serbian star chuan,"Hun rei tak lo inhre tawh kan ni a, Grand Slam final kan khel dun leh tur hian min tihlim khawp mai. Vawi tam tak kan lo inkhel dun tawh a, match ropui tak kan khelh sak theih ngei che u kan beisei a ni," a ti bawk.