Eto'o-a'n Europe a lang turin Sampdoria a ring tawk

Everton aṭanga Sampdoria zawmtu Samuel Eto'o chuan a club thar chu season thara Champions League an khelh phak a ring.

Massimo Ferrero-a'n nikuma Sampdoria a lei aṭang khan a tum ber chu Champions League khelh a nih thu a sawi

ṭhin a, he mi chung chang hi sawiin Samuel Eto'o chuan, "I tuma i chian a, tihlawhtling tura theihtawp i chhuah phawt chuan engkim i tithei a ni," a ti .

Khawvela club ṭha ber ber Barcelona, Inter Milan leh Chelsea tan pawha lo khel tawh ṭhin Eto'o hian Sampdoria-ah hian kum hnih leh a chanve cham turin contract a ziak a, a club thar hi Serie A-ah pangana an ni mek. Serie A-a pathumna chin hian Champions League an khel thei dawn a ni.

Eto'o hi tun hnaiah a khel ṭha tawk tawh lo a, Chelsea lama a khelh phak meuh loh hnuah Everton a pan a, Everton lamah pawh hian a khel tam lo hle a; nimahsela Champions League khelh tum team hian a tawnhriat hi an chhawr ngeiin an ring.