Inchawimawi tawn Murray leh a coach

Andy Murray-a coach Amelie Mauresmo chuan a nau a fak. Murray-a'n khelmualah a coach fakna a lantir.

Ningani khan Aus­tralian Open semifinal ah Andy Murray chuan Tomas Berdych a hneh a nih kha. Mauresmo chuan Murray leh a thawpuite thawhhona a ṭhat thu sawiin, "Team member-te kan inlungrual em em a, chu chuan Murray pawh kha a pui niin ka hria," a ti.

World no.1 player hlui Mauresmo chuan, "Set khatnaah khan boruak a sang em em a, mahse a insiam ṭha leh vat a, ṭha takin a khel leh thei a ni," a ti a, a nau chu a chhuang hle.

Nimin piaha Aus­tralian Open semi final Murray leh Berdych-te'n an khelh ṭum hian boruak a sosang hle a, Murray bialnu Kim Sears chu player box aṭangin

ṭawngkam bawlhhlawh tak tak hmangin a lo au nia sawi a ni. Mahse, Murray chuan a bialnu hi a chhan tlat a, "Khatiang ang boruak sosang lutukah kha chuan hriat loh hlana ṭawngkam mawi lo tak tak chhahchhuah palh mai hi a awl ve hrim hrim a ni," a ti a, kum kua lai a inzuipui tawh a bialnu chu a chhan hle.

Inkhel boruak san chhan hi Murray-a coach hlui Dani Vallverdu vang a ni pakhat bawk. Dani Vallverdu leh Murray-te hi an thawk dun reng ṭhin a, mahse nikum November khan boruak neuh neuh awm chungin an inṭhen. Dani hi Tomas Berdych-a coach-ah a

ṭang zui a, hei tak hian boruak a tisosang ta a ni.

Hemi chungchang hi Mauresmo chuan a hrethiam hle a, "Kumina Grand Slam tournament hmasa ber a ni a, a khingpui hi Dani -a enkawl Tomas ber kher a lo ni bawk nen, a boruak a sosang lo thei lo a ni," a ti bawk.

Mauresmo-i'n Murray a fak mek laiin world no. 6 Murray pawhin a coach hi a fak hle a, a coach ni tura a sawmna a pawm chu huaisen a tih thu sawiin, "Ni reilo teah a lawmman a hmuh ngei ka ring a ni," tiin Australian Open ah champion ngei a tum.