Mavericks tan guard Doncic a ropui Raptors leh Celtics an tlang

Dallas Mavericks guard Luka Doncic chu NBA playoff bika 40-point triple-double nei thei naupang ber a ni a, nimin zing khan a team hi Los Angeles Clippers lakah 135-133 a hnehna chan puiin, series-ah 2-2 a ni chiah.

Inkhel dangah Toronto Raptors leh Boston Celtics te chuan an khingpui Brooklyn Nets leh Philadelphia 76ers lakah 4-0 ve ve in series an la a, team pahnih hi Eastern Conference semifinal-ah an inhmachhawn zui nghal ang.

Hun tawp hmanrik a rik rualin Doncic-a'n 3-points a vawm lut a, team pahnih daidangtu a ni zui nghal. Kum 21 mi guard hian 43 points, 17 rebounds leh 13 assists neiin hnehna an chan theih nan a thawh hlawk hle.

Slovenian tlangval chuan, "Hun tawp dawna ka ball vawm basket-a a lut tur ka hmuh kha chuan eng nge ka ngaihtuah pawh ka hrethiam lo. Ball a luh chiah khan ka ṭhiante chu ka bulah an rawn kal khawm a, ka hun tawn tawh zinga nuam ber a tling," a ti.

Dallas Mavericks leh Los Angeles Clippers te hian Nilaini zing dar 6:30-ah game 5 an khel ang, best of seven a nih avangin conference semifinal lut tur chuan game li tal an lak phawt a 

ngai dawn.

Eastern Conference champion lai Toronto Raptors chuan Brooklyn Nets 150-122 in an hneh a, game hmasa pali an lak zawn avangin nuamsa takin semifinal an lut. Hnehna an chan theih nan hian Norman Powell (29 points) leh Serge Ibaka (27) te an khel ṭha hle.

Boston Celtics pawhin Philadelphia 76ers lakah zahngaihna an lantir bik lo, a zawna vawi li an chakna turin 110-106 in an chak. Celtics leh Raptors te an tlang hma avangin semifinal khel turin chawlh an nei rei dawn.

Inkhel dangah Donovan Mitchell leh Jamal Murray te thawhrah sengtu Utah Jazz chuan Denver Nuggets 129-127 in an hneh a, series-ah 3-1 in hma an hruai. Nilaini zingah game 5 an khel dawn, Jazz tan tlang turin vawi khat chak bak a ngai tawh lo ang.