Mbappe-a lung lawm a kim ta!

Kylian Mbappe chu Real Madrid player a ni chiang ta. July 16, Thawhlehnia phochhuahna hun an hmanah France captain chuan Los Blancos player a ni ta chu a duhthusam thleng dik a nih thu a sawi chhuak.

Kum 25 mi Mbappe hian Paris Saint Germain tana a contract a hmang zo a, a duh zawng club a zawm thei. Tun thla tir khan Real Madrid tan hian kum nga daih contract a ziak a, tun season aṭangin bul a ṭan dawn a ni.

France forward hian an ram tan Euro 2024 a khel a, hei vang hian La liga champion hian an duh anga hmaah an player thar hi an pho chhuak thei lo - Thawhlehni tlai khan an pho chhuak ta chauh.

Santiago Bernabeu khat tlatin mipui an pungkhawm a, nghakhlel taka an lo thlir Mbappe chu Real Madrid jersey ha chunga pho chhuah a ni a, a duhthusam a thlen dik bakah Spanish club ṭantute lunglawm pawh a kim ngei ang.

Mbappe chuan, "Engtik niah eraw chuan Real Madrid tan ka la khel ve ang tiin duhthu ka sam ṭhin a, mu thei lop ṭhak khawpa ka ngaihtuah chang pawh a awm hial, tunah chuan duhthusam a thleng dikin mi hlim tak ka lo ni ta.

"Keimah chauh ni loin kan chhungkua kan hlim, ka nu bianga lawmna mittui luang pawh ka hmu. Ka naupan lai aṭanga ka lo suangtuah ṭhin a nih miau avangin ka tan a hlu a, sawifiah thiam chi a ni lo," a ti.

Real Madrid leh Mbappe hi awlsam taka inrem an ni bik lo, kum thum liamta kha ngawrh takin an lo indawr tawh - Real hian pound maktaduai 137 sengin lakluh an tum a, indawrna pawh thui tak a kal hman.

An inrem ngei dawn emaw tih laiin PSG tan contract a ziak leh ta zawk a, khawvel mak tih a ni. Paris club tan khel zui mah se a rilru erawh a nghet lo tih a lang fo - nikum mai pawh khan chhuak tur angin thawm a ring hman hle.

Sum ren miah lo Saudi Arabian club Al-Hilal chuan pound maktaduai 259 hum chungin PSG an dawr a, Ligue 1 club chuan an lo pawm hmiah, khawvela player man tam ber leh hlawh tam uchuak ber nih theihna kawng a inhawng tihna a ni.

Mahse, Mbappe hian Saudi Arabia lam a hawi duh tlat lo - club thuneitu lam nen inhmuh thiam loh chang nei mah se a dawhthei zawkah a ṭang a, a contract neih lai hmang zoin a duh tak Real Madrid a zawm ta zawk.

Real Madrid president Florentino Perez hi a player duhzawng hlah ngai lo a ni a, a tawpah chuan a duh tak a nei leh ta nge nge tihna a ni. La Liga leh Champions League nomawi kawl mektu an ni a, season tharah team dang tan hmachhawn an chakawm lo khawp ang.

Spanish champion hi season thar inbuatsaih turin August thla tir hian United States-ah an zin dawn a, he hunah hian team ṭha AC Milan, Barcelona leh Chelsea te nen an inkhel ang. Mbappe hi a inlan nghal dawn em tih erawh a la chiang lo.

Real Madrid jersey number 9 ha tur Mbappe chuan, "Real Madrid tana ka match hmasa ber khelh hlan ka nghakhlel hle, mahse a hun tur erawh ka thu ni loin manager thu a ni zawk," a ti, coach Carlo Ancelotti kuta awm a ni.

Kum 2009 khan Real Madrid hian Manchester United aṭangin Cristiano Ronaldo an lo lalut tawh a, khatih lai khan Ronaldo hian Real Madrid badge fawpin jersey number 9 nen bul a ṭan - Mabppe pawhin Ronaldo tih ang thoin a ti a, khelmual chhungah a hniak hnung a zui zo ang em tih chu hunin a la hril ang.