Police hmaah tha za rual SYS FC

LZ Juice MPL11-ah champion lai Mizoram Police-in vawiin chhun dar 12:30 hian SYS FC an hmachhawn dawn. Inkhel en châkawm bik a ni.

Police hi champion lai an ni a, Mizo player ṭha rual awmna ni mah se an kum a upa ve tawh. SYS hi naupang tha za rual an ni a, kum upa lakah fiahin an awm dawn.

Police hmel hmang

Lalbiaksanga Colney kaihhruai Police hian an match hmasa berah Ramhlun Athletic 3-2 in an hneh a, match hnihnaah Chanmari lakah 1-0 in an chak lo.

Chanmari lakah Police tan chetsual theih a ni a, chutihrualin player luh dan erawh a mak ang reng thung. Ramhlun Athletic an hmachhawn ṭum hian Police-in an ṭhat dan tura ngaihin player an rem a, Chanmari an hmachhawn ṭumin an thlak hlawk.

Ramhlun Athletic an hmachhawn ṭumin goalkeeper-ah F. Lalmuanawma a awm a, defence laiah Lalhmunmawia leh Laldinpuia te inkawpin mual sir lamah Lalrinzuala Khiangte leh Lalrodawngkima te an awm thung.

Midfield-ah R. Malsawmtluanga leh H. Lalbiakthanga te an inkawp a, tlarhmaah Malsawmfela hnungah F. Lallawmkima a awm. Mual sir aṭanga nawr turin Lalbiakhlua leh Isaak Malsawmkima te an awm thung.

Chanmari an hmachhawn ṭumah erawh Rinzuala, Biaktea leh MS-a te chu bench-ah an awm daih. Left back-ah Lalruatpuia rawn kir chu a mak lo a, amaherawhchu match pawimawhah tawnhriat nei tlem zawk Zaithanmawia, H. Sanglianmawia leh B. Rosangliana ten bul an ṭan chu a mak.

Ramhlun laka goal khungtu MS-a chu Chanmari an hmachhawn ṭum hian goal mamawh mah se bench-ah a ṭhu tluan. Coach Lalbiaksanga Colney chuan, "Chanmari lakah khan game plan kan nei a, chumi mil chuan player an lut. Kan tumah kan hlawhtlingah ka ngai a, goal-ah kan vanduai mai a ni," tiin Vanglaini a hrilh.

Police an phur

Mizoram Police hian Chanmari FC hneh lo mah se July 16, Thawhlehni khan MPL11 atana an jersey thar tur an tlangzarhna an nei a, SYS FC an hmachhawn aṭangin jersey thar hi an ha dawn.

MPL11 champion lai Police hian champion nomawi humhim ngei an tum a, chumi tur chuan theihna an nei bawk. Police coach BS-a Colney chuan, "SYS hi an che rang a, game ṭha tak an khel bawk. Mahse, keini tawnhriat nei zawk kan ni a, khelh dan tur pawh kan thiam ang," tiin Vanglaini a hrilh.

Police hian MPL-ah tawnhriat nei ṭha a, chutihrualin an fitness duhthu a sam thei bik tawh lo. SYS an hmachhawn hun hi chhun dar 12:30 a ni dawn a, ni a sa ṭha a nih chuan Police tan fimkhur lehzual a ṭul ang.

SYS ve thung

Coach Lalmuankima enkawl SYS FC-in MPL an khelh dawn vangin kum upa player an lak belh lo a, an player neihsaah rinna an nghah. SYS hian match hmasa berah Sihphir Venghlun 2-0 in an hneh thei a, Chawnpui nen 1-1 in an inhnehtawk leh bawk.

Lunglei club-in bul an ṭan chhe lo a, match hnihah point li an hmu. Chutihrualin club lian pathum Aizawl FC, Chanmari FC leh Police te an la hmachhawn lo a, fiahna hautak bik an la hmachhawn lo tiin a sawi theih.

SYS FC hian team ṭha pathum zinga mi Police an hmachhawn dawn a, fiahna dik tak tiin a sawi theih ang. Coach MK-a naute hian khelh dan nghet ṭha tak an nei a, team anga pressure an pek ṭhat bawk avangin an khel a hmuhnawm ṭhin hle.

SYS hian goal thum an khung tawh a; freekick, penalty leh 'open play' aṭangin goal an khung. Chutihrualin open play aṭanga an khung hi Ricky H. Vanlalhriatsanga 'solo goal' a ni a, team anga khel siin team anga goal khung an la nei lo. Police lakah attacking siam ṭhat hret an tum ang a, a vawi khat nan 'clean sheet' neih an tum bawk ang.