Augustine leh Felix te inlan hun
LZ Juice MPL11-ah Ramhlun Athletic forward Felix Lalruatsanga leh Aizawl FC winger Augustine Lalrochana ten goal li ve ve an khung tawh a, vawiin tlai dar 3:30 hian RG Stadium-ah Ramhlun leh Aizawl FC te hi an inkhel dawn.
I League club hian goal sarih an khung tawh a, Ramhlun hian goal nga an khung ve tawh bawk. Goal khung thei pahnih an inkhel dawn a, goal lut leh ngei turah a ngaih theih.
Hei le, Felix
Serchhip tlangval Felix Lalruatsanga hi YouTube aṭangin ball sep thiam vang leh football academy vangin hriat a hlawh. Season liam ta khan Chanmari FC-in an lalut a, I Day Football-ah inlan mah se MPL-ah an chhawr zui ta lo.
Felix hi Serchhip-ah kirin a intuai hriam a, midfielder aṭangin striker-ah inletin LPS Cup-ah Republic Veng tan khelin goal nga a khungsak a, hemi hnu hian Shillong league-ah inchher hrem leh bawk.
MPL11 ṭan meuh chuan Felix hian match fitness ṭha tak a nei tawh a, champion lai Mizoram Police lakah penalty hlah mah se goal a khung ta tho. Felix-a'n Bethlehem lakah hattrick a siam a, chakna goal a khung tel avangin a goal khung hi a hlu zual hle.
Augustine ve thung
Aizawl FC-in an match hmasa berah Chawnpui FC lakah goal khat chauh an khung a, point khat chauh an hlawh chhuak. Coach Victor Lalbiakmawia'n tlarhma siam ṭhat a ṭul thu a sawi a, Sihphir Venghlun lakah an finishing a ṭha ta hle.
Vairengte tlangval Augustine Lalrochana'n goal li ngawt a khung a, Sihphir Venghlunin dan ngahihna an hre lo. Season liam ta khan R. Lalthanmawia (Amawia) leh R. Ramdinthara (Tharpuia) te an awm avangin Augustine hian hmun a chang tam tawk lo.
Tun ṭumah erawh Augustine-a'n a hun ṭha bawhpelh a tum lo a, goal li a khung der tawh. Champhai Zotlang tlangval Lalbiakdika (BD-a) pawhin kumin hi a hun ṭha tih a hria a, mual sirah a hmuhnawm a, goal khat a khung ve bawk.
Engtin zel?
Ramhlun Athletic hian Bethlehem an hneh avangin an phur thar a, chutihrualin Aizawl FC meuh laka point hlawh chhuak tur chuan tlarhnung rem phui a ṭul dawn. Tun inelnaah goal nga khung tawh mah se goal nga an chhuah tawh a, tlarhnung an ngaihthah thei lo ang.
Aizawl FC erawh I League club an ni a, hma an la sawn zel dawn. FIFA-in a hrem avangin transfer an la tifel thei lo a, hremna hi an hlih hnaih avangin Ramhlun Athletic lakah team ṭha zawk an inlan thei tawh hial ang.
I League club hian Covid-19 hnuah nomawi an chawi leh tawh lo a, season liam taa semifinal an luh loh bawk avangin kuminah champion an tum hle.