Sihphir Venghlun an tho, Chanmari an chak zel

LZ Juice MPL11-ah Sihphir Venghlunin season liam ta ADFA First Division phuba lain FC Bethlehem an hneh a, MPL-a hnehna an chan hmasak ber a ni. Inkhel hnuhnung zawkah Chanmari FC-in Chawnpui FC 2-0 in an hneh a, Lalsangzuala Hmar hote hi match thum khelhah la chak vekin hmahruaitu an ni.

MPL11 round 3-ah hian MFA hruaitu K. Lalenghluna (Maenga) sunna hun hman a ni.

SVFC an chak

Sihphir Venghlunin chak tumin bul an ṭan ṭha a, goal an khung hma - Malsawmtluanga Pautu hmangin minute linaah an khung nghal. FCB-in Joseph Lalṭhafela freekick hmangin minute 43-naah khungin si phurh sut mah se Lalawmpuia hmangin Sihphir Venghlun hma an hruai leh ta tho.

Second half-ah PC Lalruatsanga a rawn langsar a, AIFF Futsal Club Championship-a top scorer hian goal hnih khungin Sihphir Venghlun chu dinhmun ṭha lehzualah a dah.

Hun tawp lamah FCB striker Danny Zorammawia'n a penalty hlawhchhuah chu goal-ah chantir mah se result a tidanglam pha lo. Robert Laldinthara hoten point thum hlu tak an hlawh chhuak a, relegation zone an chhuahsan nghal.

Chanmari an ṭha

Chanmari FC-in champion ngei tumin player an la lut a, I League 3 an khelh dawn bawk avangin MPL11 champion tura rinkai zinga mi an ni.

Nimin inkhelah Lalsangzuala Hmar kaihhruai Chanmari hian Chawnpui lakah inkhel an thunun a, first half-ah goal a lut lo. Minute 69-naah KC Malsawmsanga freekick pet chu defender Lalhmangaihsanga'n a pet goal.

Goal luh hnuah pawh Chanmari FC leh Sawmsanga te an che ṭha chhunzawm. Inkhel thununtu Chanmari tan PC Rosangzuala'n ṭha takin a pet goal a, 2-0 in hnehna an chang.

Chanmari hian goalkeeper RS Lallawmzuala bul an ṭantir a, Chhinga Veng FC aṭanga an lakluh goalkeeper hi a clean sheet nghal. Chutihrualin match hmasa pahniha inlan Zothanmawia'n goal a chhuah bik lo.