Tuin nge Gareth Southgate thlak dawn?

Euro 2024 a zo a, Euro 2020 nen England tan chuan thawnthu a danglam lo - final an thleng a, a tawpna chu final bawk a ni. An hmuh phakah nomawi a inhung a, an chawi erawh a rem ve lo. An tan duan a ni ve ta lo em ni? tihpalh mai awl tak a ni.

England tlak avanga an mittui pawh a hul fel hmain chanchin thar hriat tur dang a awm zui a, major tournament palia vawi thum ngawt semifinal hruai thleng theitu Gareth Southgate a bang a, England coach a ni tawh dawn lo.

English FA chief executive Mark Bullingham-a'n a rang thei ang bera Southgate thlaktu tur an zawn tur thu a sawi a, coach tam tak hming a ri nghal - tu ber hian nge Southgate chu thlak ang, tiin fans leh media ten an inrinsiak mek e.

Lee Carsley

Football fans tam zawkin Carsley hi an hre kher lo ang. England Under-21 enkawl mektu a ni a, nikum lawk khan European Under 21 Championship-ah England a champion pui thei. Youth team enkawl lamah hming a chher viau a, Southgate anga age level aṭanga senior team enkawl tura rin a nih pawhin a mak lo ang.

Kum 50 mi Carsley hian senior team erawh a la enkawl ngai lo a, nikum khan Republic of Ireland chuan dawr mah se, England U21-a cham a thlang zawk. England-in coach nghet an la lut lawk lo a nih chuan manager lailawk a nih a rinawm a, a chet ṭhat chuan a nghet daih thei bawk.

Pep Guardiola

Barcelona, Bayern Munich leh Manchester City tan club level-a nomawi chawi theih ang chu a chawi kim vek a, Spanish coach hian international football-a sulhnu hnutchhiah a hreh lo. Mahse, nakkum nipui thleng City-ah contract a la nei a, thlem chhuah a harsa mai thei.

Chutihrual chuan England hian World Cup 2026 thlir rana thutlukna an siam a nih chuan, coach lailawk neih a, nakkuma Pep awl hun chan pawh a fuh thei - a hlawh atan insen huai erawh a ngai ang.

Eddie Howe

Newcastle United coach hi English mi a nih avangin fans tam tak chuan England enkawl turin an duh. Bournemouth-ah hming a chher hnuin Magpies a kaihruai pangngai viau a, nomawi duha tuihal England tuihal hnem nan a tawk ang em, tih erawh zawhna chhan harsa tak a ni.

Kum 46 mi coach hian kum 2027 thleng St James' Park-a cham turin contract a nei a, mahse, England-in an sawm a nih chuan a hnar phal kher lo ang. FA chuan an shortlist zingah an telh niin an sawi.

Jurgen Klopp

Football ngainatu zingah Jurgen Klopp a mikhual lo. Liverpool boss hlui hi Anfield chhuahsan hlim a ni a, chawlh hahdam a duh. Mahse, international football-ah chuan club ang emin hna a tam lo a, German coach hian hahdam takin England a enkawl thei ang.

Kum 57 mi coach hi USA nen pawh sawi zawm a ni a, Germany coach Julian Nagelsmann a bang a nih chuan an ram team enkawl tura sawi a ni bawk - ani pawh a hlawh atan insen huam erawh a ngai dawn.

Mauricio Pochettino

Tottenham Hotspur-a a hnathawh avangin fak a hlawh viau a, Chelsea a enkawl tirhah talbuai deuh mah se, season tawp lamah chuan team tak tak a din tih a lang thei. Mahse, Blues nen an inṭhen ta tho a, Argentine coach hi hna nei loin a awm mek.

London-a cheng Poch hian Chelsea a enkawl hma khan club tenau tam tak sawmna a hnar a, team langsar enkawl loh ai chuan chawlh hahdam mai kha a thlang zawk. England hian an duh takzet a nih chuan a hnar phal kher lo ang.

Graham Potter

Brighton & Hove Albion boss hlui hian England coach ni tura ringtu a ngah hle. Brighton-a a hnathawh thlirin a awm lo hran lo a, chutihrual chuan Chelsea-a a hnathawh hretu tan chuan a iaiawm deuh mai thei - Stamford Bridge-ah hian thla sarih chiah a cham hman a, an inṭhen zui.

Heti chung hian English coach zah kai pawl erawh a la ni reng a, Chelsea a chhuahsan hnuah Ajax leh Leicester City nen an lo indawr tawh a, Sweden dawrna a hnar bawk. International football lamin a lung len chiah lo mah se, England hnar phal tur erawh a ni lo.

Thomas Tuchel

Kum 2021 khan Chelsea chu Champions League nomawi a chawipui a, Blues fan-te thinlungah a la tla na reng. Mahse, hemi hnua a club enkawl Bayern Munich-ah beisei a phak lo a, a chhuahsan. German club hian an duhthusam thlaktu tur an hmuh leh loh avangin cham turin thlem mah se, a cham duh tawh bik lo.

Paris St-Germain leh Borussia Dortmund boss hlui hian English football-a kir a hreh lo a, England team enkawl a châk. Manchester United-in Erik ten Hag an chelh hma khan Old Trafford-a kal tur anga sawi a awm hman bawk.

Coach dang

Coach langsar tak tak karah Chelsea leh United nena sawizawm hlawh hman, Ipswich Town coach Kieran McKenna hming pawh lam rik a ni ve leh a, a hnathawh a ṭhat viau rualin a tawnhriat neih tlemna erawh fans tam takin an iai phah ang.

Chelsea legend Frank Lampard chu lam rik zingah a tel a, Middlesbrough coach Michael Carrick, Celtic boss Brendan Rodgers leh manager thawm nei na ve tak Jose Mourinho te pawh an sawi ri - a la ngaihnawm dawn chauh niin a lang.