Liverpool neituten Bordeaux lei leh dawn lo

Premier League club lar Liverpool neitu Fenway Sports Group chuan Bordeaux lei tum mah se, French club talbuai mek lei an tumna hi an ṭhulh leh a, club lei fel hnua sum senso tur tam lutuk chu an inhnuhdawh chhan langsar zingah a tel.

FSG hian kar hmasa lawk khan French club hi lei tuma inbiakna kalpui mek a nih thu an sawi a, mahse, stadium sak ṭhat ngai te, sum leh pai lama French football dinhmunte thlirin Ligue 2 club lei an tumna hi an ṭhulh leh a ni.

Ligue 1 vawi ruk champion tawh Bordeaux hi sum leh pai lama an talbuai avangin French football-a club-te sum dinhmun thlirtu DNCG chuan Ligue 2 khel zui tlakah pawh an ngai lo a, an ram third division inelna National 1 lama inlan turin an ti a, hei hi ngaihtuah ṭhat turin club lam hian an thlen mek.

Bordeaux chuan thuchhuah siamin, "Fenway Sports Group chuan FC Girondins de Bordeaux leh club-a share neitute chu, club lei an tumna an ṭhulh tih min hriattir a, stadium sak ṭhatna tur sum ngai hnem leh sum leh pai lama French football dinhmun derthawng nia an hriatte chu he club an lei loh chhan a ni," an ti.

FSG chuan, "Kan duh angin a tawp khar thei ta lo mah ila, Bordeaux leh club ṭantute chu an hma hun zel atan duhsakna kan hlan a ni," an ti. FSG hian Liverpool bak club dang lei tur hi an ngaihven sa hrim hrim a, kumin kumtira chief executive of football Michael Edwards an lakluh leh khan, a hna turah FSG hnuaia club dang zawn chu a tel a ni.