Spurs-in Emerson lei duh Milan an hnar

Tottenham Hotspur chuan an defender Emerson Royal lei tuma AC Milan dawrna chu an hnar a, Italian club hian euro maktaduai 10-in an dawr. Spurs hian an hralh phal lo tawp a ni lo a, mahse, Milan ngamna zat hi tlem an ti!

Kum 25 mi right back hi Borussia Dortmund leh Saudi Arabia lam club-te pawhin lakluh an duh nia sawi a ni a, mahse, man man taka an hralh dawn a nih loh chuan Spurs hian Brazilian defender hi chelh an pawi ti lo.

Hetihrual hian a chhuak thut a nih chuan a hmun ruak luah tur erawh an thlithlai ru reng tho a, Brest defender Bradley Locko chu London club nen hian sawizawm a ni mek. Mahse, tuna an thlithlai ber chu tlarhmaa khel tur player a ni.

Spurs hian midfielder pahnih, Leeds United aṭangin Archie Gray leh Swedish club Djurgården aṭangin Lucas Bergvall chu tun nipui transfer-ah hian an la lut tawh a, RB Leipzig aṭanga loan-a an hawh Timo Werner chu loan bawkin an la chhunzawm dawn bawk.

Ange Postecoglou enkawl Spurs hi season thar atan an inpuahchah mek a, nizan dar 11:30 khan Scottish Premiership club Hearts nen inkhelin, Queens Park Rangers chu Inrinni zan hian an hmachhawn dawn bawk - kar leh lamah Asia tour an nei ang.