Euro team of the tournament an puang ta

Germany-ah Euro 2024 chu ropui takin khelh a ni a, a zunzam erawh kan la kalsan hleithei lo - UEFA chuan Euro 2024 team of the tournament chu Thawhlehni zan khan an puang ta a, Spain-in an thawh hnem ber.

Champion team Spain hian player paruk ngawt an thawh a, final-a an hneh tak England erawhin Kyle Walker bak thawh an nei lo! France-in player pahnih an thawh a, Switzerland, Germany leh England ten player pakhat ṭheuh an thawh ve bawk.

Walker a tel ve

Euro 2024-ah Kyle Walker-a'n England tan minute zawng zawng a khel kim vek a, Euro 2020-a team of the tournament-a a lo lan tawh chu chhunzawmin, team of the tournament-ah hian a lang nawn - England squad aṭanga teh chuan ani aia phu an awm chuang lo.

Manchester City defender Walker hian minute 690 khelmualah hun hmangin, vawi riat tackle a nei a, a passing accuracy chu 90.58% niin, vawi 29 ngawt ball recover a nei - defender hnathawh tur chu a tlin hle.

France an langsar

Semifinal-a Spain ngam lotu France-in player pahnih an thawh a, an player thawh pahnih hi tlarhnung lam ve ve an ni. Si ban nghak turin Mike Maignan chu thlan a ni a, AC Milan keeper hian match ruk a khelhah vawi li clean sheet a nei a, vawi 16 save neiin, match tina 2.67 save nei ang a ni.

Tlarhnunga France rinrawl William Saliba pawh hnial rual lohin player lang zingah a tel ve a, match ruk an khelhah a inlan vek - vawi 31 ball recover neiin, vawi sarih tackle a nei a, 95.5% passing accuracy neitu hi Arsenal chuan lawm takin an lo hmuak ang.

Swiss aiawh Akanji

Switzerland-in quarterfinal an khelh theih nana player pawimawh Manuel Akanji chu team of the tournament-ah a lang a, Manchester City defender hi match nga an khelhah inlan vekin, vawi 37 ball recover a nei a, 94% passing accuracy a nei bawk.

Spain fullback ṭha mi Marc Cucurella pawh a phu ang ngeiin a lang a, match rukah inlanin, vawi 34 ball recover a nei a, 92.7% passing accuracy a nei - goal venhim kawnga a ṭangkai tluk zetin, goal nawr kawngah a ṭangkai tel a, vawi khat assist a nei.

Spain rorelna midfield

Player of the tournament atan Rodri thlan a ni a, team of the tournament-a lang lo chi a ni lo. Goal thum khung a, assist vawi hnih neitu, top scorer Dani Olmo pawh a lang a, a tira Spain bul ṭantu zinga tel phak lo hi inelna a zawh meuh chuan a langsar ta hle.

Paris Saint-Germain midfielder Fabian Ruiz pawh a lang a, match ruk a khelhah Ruiz hian vawi hnih goal khungin, assist vawi hnih a nei a, Spain game cheimawitu tiin sawi ila, sawi uar lutuk kan ni lo ang - Spain midfield-a inkawp ṭhin pathum hi midfield-ah thlan vek an ni.

Naupang rual

Hnial rual lohin tlarhmaah Spain tana hmuhnawm em em pahnih Lamine Yamal leh Nico Williams an lang - kum 17 mi Yamal hi Young player of the tournament atan thlan a ni bawk a, ani hian match sarih a khelhah goal khat ropui bik khungin, assist vawi li a nei bawk.

Nico Williams hian match rukah goal hnih khungin, assist vawi khat a nei a, Yamal-a nen an inkara ding turin Jamal Musiala chu dah a ni. Musiala hian Germany tan match ngaah goal thum a khung hman.

A thlangtute

Euro team of the tournament hi fan-te thlan ni loin, expert thlan a ni. UEFA chuan Euro-ah hian match tinah technical observer dahin, anni hian match tin atan player of the match pawh an thlang. Euro 2024-a technical observer langsar zingah AC Milan leh Real Madrid coach hlui Fabio Capello, Scottish coach lar David Moyes, Liverpool boss hlui Rafael Benítez leh Chelsea coach hlui Avram Grant te an tel.

Anni bakah hian Romanian legend Ioan Lupescu, Northern Ireland coach Michael O'Neill, Croatian legend Aljoša Asanović, Celtic legend Packie Bonner, Netherlands international hlui Frank de Boer, Manchester United coach hlui Ole Gunnar Solskjaer, Middlesbrough boss hlui Aitor Karanka leh Montpellier coach hlui Jean-Francois Domergue te chu technical observer hian an awm.

UEFA Team of the Tournament (4-3-3)

Goalkeeper: Mike Maignan (France)

Defenders: Kyle Walker (England), Manuel Akanji (Switzerland), William Saliba (France), Marc Cucurella (Spain)

Midfielders: Daniel Olmo (Spain), Rodri (Spain), Fabian Ruiz (Spain)

Forwards: Lamine Yamal (Spain), Jamal Musiala (Germany), Nico Williams (Spain)