A dinhmun ngaiah Jannik Sinner

Mipa tennis thuneitu sang - Association of Tennis Professionals (ATP) ranking chhuak tharah Jannik Sinner chu a dinhmun ngaiah a ding a, a chung berah a awm chhunzawm zel.

Italian tlangval hian Wimbledon khelh zawh takah khan quarterfinal a paltang zo lo, mahse amah hnaih bertu Novak Djokovic pawhin Carlos Alacaraz-a title kawl lai a chhuhsak thei bik lo a, dinhmun ngaiah a awm zel rih dawn a ni.

Kum 22 mi Sinner hian tun season tir lam khan Australian Open nomawi a chawi a, inelna dangah a che chhe lo bawk. Djokovic leh Alcaraz inlehthal zak zak karah dinhmun sang ber a rawn luah thei a, awlsam taka nek chhuah mai theih a ni tawh bik lo.

Alex de Minaur chu paruknaah a awm - Australian tlangval hian tennis a khelh hun chhunga a tawn san ber ṭum a tawng. Wimbledon quarterfinal-ah khan Djokovic nen intawng tur ni mah se hliam vangin a inhnukdawk, heti chung hian ranking lamah chuan a hmaa awm player pathum a kal kan ta tho a ni.

India tlangval Sumit Nagal chu 68-na a ni phak a, ani pawh hian ranking a neih san ber ṭum a tawng mek. Kum 1973 aṭangin world ranking siam a ni a, a hnu lamah Nagal hi Indian tlangval zinga ranking sang palina a ni ta chiah bawk.

Tun hmain Indian mipa player - Somdev Devvarman (62), Ramesh Krishnan (23) leh Vijay Amritraj (18) te chu Nagal aia ranking sang hian a lo awm tawh. Chutihrualin tunlaia Nagal khelh dan erawh dah hniam a rem bik lo ang.