Argentina player chet danah FFF an lawm lo

Copa America champion Argentina player-ten champion an lawmna boruakah, vun rawng vanga inhmuhsitna lam rawngkai an sa rual a, video hi Enzo Fernandez chuan social media lamah a dah chhuak.

Argentine player-te hian France player midum ho deusawhna lam thu an tiri a, hei hi French Football Federation (FFF) chuan a ngai thutak hle a, football thuneitu sang FIFA hnenah an zualko ngei dawn a ni tih an sawi nghal.

Fernandez-a video hi Chelsea lama a khelhpui midum player ho pawhin an ngaithei lo, hei vang hian Chelsea pawhin hma an la dawn. Eng ang takin nge nghawng a neih dawn tih erawh sawi lawk vek theih a la ni lo thung.

An thiltih chungchang sawiin Fernandez chuan, "Ṭawngkam mawi lo chu kan lo hmang ngei mai a, chhuanlam siam tur pawh kan nei lo. Copa America champion kan nih lawmna chi khata khatiang thil a thleng kha a pawi ka ti hle.

"Chi inthliarna leh inhmuhsitna duh lotu zinga mi ka ni a, kha video khan kan nihna dik tak a lantir tihna a ni bik lo," a ti. Chelsea chuan an player ngaihdam dilna hi an lo hmu a, an duhlai Enzo chuan zirtur a nei tih sawiin, club chhungah an inzilh mai dawn tih an sawi bawk.

FFF an ngawi thei lo, an president Philippe Diallo chuan Argentine Football Association (AFA) an biak tur thu sawiin, "French team laka khatiang thil tih kha a rem lo a, infiamna leh mihring dikna chanvo humhim a nih theih nan hma kan la ang," a ti.

Qatar World Cup final-ah khan Argentina hian France hnehin nomawi an lo chawi tawh a, ram pahnih hian khelmual chhung bakah a pawn lamah chanchin an lo nei tawh ṭhin a, ram pahnih inkarah boruak a nung hle a ni.