Messi a chawl rih dawn

Lionel Messi chu a kerek hliam vangin a chawl rih dawn a, a chawlh chen tur tak hi sawi chian theih la ni lo mah se Inter Miami tan a tlem berah match hnih tal chu a khel thei dawn lo tih a chiang tawh thung.

Copa America final-ah Messi hi a inhliam a, inkhel tluan thei loin thlak a ngai. Messi hliam mah se Argentina hian Colombia chu 1-0 a hnehin an champion tho, a vawi 16 nan Copa America title an la.

Inter Miami coach Gerardo Martino chuan, "Messi hliam hi uluk taka enkawl a ni a, a khat tawka endik reng a ni. Final kha kan lo en ve reng a, a nihna takah chuan hliam nei chungin hun eng emaw ti chhung kha chu a khel.

"Leo a inkhelh luih tir avangin Argentina manager Lionel Scaloni kha kan dem hran lo, a chhan chu a theih chhung chu Messi hian inkhelh a duh a, an ram tana nomawi hlawhchhuah a duhna kha a sang em a ni.

"A rang thei ang berin kan hnenah lo kir leh se la tih hi kan duh dan a ni a, chutihrualin kan hmanhmawh thei lo. Kan match hmabak pahnihah hi chuan a inlan ve thei dawn rih lo tih a chiang," tiin a sawi.

Major League Soccer (MLS) khelh laiah Miami hian tukin hian Toronto an hmachhawn a, tun kar tawpah Chicago an mikhual zui leh bawk ang - heng inkhel pahnihah hian Messi a inlan dawn lo.

MLS season kal laiah Eastern Conference lamah Inter Miami hi pahnihna an ni mek. Match 23 khelh tawhah vawi 14 chakin an chunga awm FC Cincinnati chu khelh zat inangah vawi khatin an chak tam zawk thung.