Mexico coach Lozano an ban

Copa America group stage an paltlang zawh loh avangin Mexico chuan an coach Jaime Lozano chu a hna aṭangin an ban, an tlak hlim khan a hna ngai chelh tur anga sawi ni mah se an inṭhen leh hnuhnawh ta zawk a ni.

Mexican Football Federation chuan thuchhuah siamin, "Copa America aṭanga kan tlak chhan leh hma kan sawn theih dan tur hrang hrangte kan zirchiang a, keini MFF chuan Jaime Lozano hian a hna ngai chelh chhunzawm se kan duh.

"Ruahmanna thui tak kan nei a, a contract neih lai hi kum 2030 thleng daih a ni, kan hma lawka World Cup lo awm turah pawh min ho se kan duh, mahse hna chhunzawm a duh ta lo zawk a ni," an ti.

Lozano hian kum khat chhung Mexico team hi a enkawl hman - 2023 Gold Cup title a lakpui a, kumin tir lamah khan CONCACAF Nations League final an thleng bawk a, nomawi inchuhnaah United States an ngam lo thung.

A hmun ruak luah tur hi sawi chian a la ni lo - Mexican chanchinbu ten an tarlan dan chuan, coach chhuak ta Lozano hmun ruakah hian Javier Aguirre chu an ruat mai a rinawm, ani hian 2002 leh 2010 World Cup-ah khan an ram hi a lo kaihruai tawh a ni.