Inter tan Martinez a inpeih

Hrem vanga match hnih a khelh theih loh hnuah Lautaro Martinez chu chhawr theih a ni leh tawh a, Argentine striker hi zanin dar 1:15-a Napoli nen Coppa Italia semifinal first leg an khelh hunah inlan turin a inpeih leh tawh.

Kum 22 mi Martinez hi tunlai striker chhuak thar hmuhnawm zinga mi niin, tlarhma lamah Romelu Lukaku nen an inkawp fuh hle. Cagliari nen an inkhelh ṭumin hnawhchhuah a ni a, hei vang hian tun hnaia an match hnuhnung pahnih chu a khel thei lo.

Antonio Conte kaihhruaina hnuaia indin thar Nerazzurri hian Serie A lamah AC Milan hnehin hmahruaitu an ni mek, league bakah cup inelna lamah pawh hlawhtlinna chan an tum avangin season hmasa Serie A pahnihna Napoli hnea ngai.

Inter leh Napoli te hi tun hnaia an intawn hnuhnung 10-ah chuan an intiat tawk hle, vawi li ve ve chakin ṭum hnih dang chu an inhnehtawk thung; zaninah pawh Inter hi rinkai zawk chu ni mah se thil chiang a la awm bik lo.

Napoli manager Gennaro Gattuso chuan, "Lecce kan hneh lo zo chiah a, tunah chuan chona hautak zawk kan hmachhawn a ngai. Inter hi team ṭha tak ni mah se keini lam pawhin hnehna chang turin theihna kan nei ve tawk," a ti.

Carlo Ancelotti bantu Napoli hian beisei angin season an hmang lo, league lamah chuan 11-na dinhmun an luah pha hram. Champions League lamah last 16 lut tawh mah se Barcelona an hmachhawn dawn avangin beisei a sang lo - Coppa Italia hi nomawi an beisei theihna hnai ber a ni.