2016 NBA Champion Cleveland Cavaliers

LeBron James chuan 'Final atan hian ka theihna leh thiamna, ka rilru leh thisen bakah mittui thlengin ka hlan," a ti. Cleveland Cavaliers-in 2016 NBA champion nomawi an chawi zawha an thiampuipa James-a mittui leh thusawiin final boruak a sawi fiah a, Golden State Warriors hneha NBA champion nih hi a ropui a ni!

Nimin zing khan Oracle Arena, Oakland-ah NBA Finals Game 7 khelh a ni a, James-a triple double neih hmangin Cleveland chuan Golden State lakah 93-89 a hnehna changin an club history-a a vawi khat nan NBA champion an ni. Basket hnuhnung ber luttu James chu NBA Finals bika Most Valuable Player atana thlan a ni.

Thawhlehna chu...

Kum 1947 aṭanga NBA Finals khelh a nih hnuah eng team mah 3-1 a an hnufual hnuah an tho chhuak ngai lo a, tih theih loh ang hial a ngaih a ni. Mahse, Cleveland hian tih theih loha ngaih chu an ti thei a, ropuina ram lut tura huaisenna an neih zia chu an game hnuhnung pathumah an lantir.

Game 7 inkhelah team pahnih an fimkhur tawn a, chesual thei an ni tih an hre chiang dun hle. Inkhelh ṭan tirha Cleveland lamin point hnih an luh hmasak chu first half chhungin Golden State tan Draymond Green-a three point vawi nga vawm luhin a zui a, chawlh lawk laiin GSW-in 49-42 in hma an hruai.

Third quarter-ah Cavs lamin point 33 neih belhin Warriors-in point 27 an neih belh thung a, quarter hnuhnung berah pawh an fimkhur em avangin ṭum danga an inkhel nena khaikhin chuan point a lut tam tawk lo.

Hun tawp nan second 53 chiah a awm tawh a, hetih lai hian team pahnihte hi 89-89 in an intluk tawk mek! Hun pawimawhah Kyrie Irving rawn inlarin three point hlu bik rawn vawm lut a, James-a'n free throw aṭangin point khat a luh belh. Cavs player pawimawh pahnih hian Game 5-ah khan point 41 ve ve an lo score tawh bawk. Cleveland hian nikum NBA finals-ah Kyrie Irving leh Kevin Love te tel loin Warriors an hneh lo a, an dam kim meuh chuan Cavs-in Curry kaihhruaina hnuaia GSW rorelna an titawp.

James a ropui e

American power forward James hian Game 7 bikah hian point 27 a score bakah rebound vawi 11 lain assist ṭum 11 a nei bawk a, triple double neiin team tana thawhhlawk ber a ni.

Kum 31-a upa James hian final game hnuhnung pathumah point 109 zet a hlawh chhuak a, Game 7 bikah hian block shot vawi sarih neiin heng zingah hian hun tawp nana minute 1:50 chauh a awm tawha season hmasa NBA Finals MVP Andre Iguodala point score tur a block a tel - Warriors star rual ho zingah King James-a hmaa ding thei an awm lo!

Basketball chanchina sawi apianga hming lang hmasa zinga mi Michael Jordan, Bill Russell leh Kareem Abdul-Jabbar te huangah James a hming hi a chuang kumkhua tawh dawn a, heng player pali te chauh hi NBA champion vawi thum ni thei leh MVP (regular season) atana ṭum li an tlan nawn te an ni. James hi a pumrua a lian a, tharum a ngah bakah a thiam a, a fin tel bawk avangin hetiang dinhmun luah hi a phu hle a ni.

Miami Heat tana season li a khelh hnua an khaw club Cavaliers lama kir leh James chuan, "He hmunah hian thil tum neiin ka lo kir leh a, chu chu champion hi a ni. Dinhmun hniam zawka kan din hman avang khan mi tam zawk chuan chak lo turah min ngai tawh a, mahse tunah chuan Ohio mipui ten kum 50 chuang an lo nghah tawh chu an nghak chhuak ta a, history siamtute zinga ka tel ve thei hi ka lawm hle," tiin a sawi.

Cleveland coach Tyronn Lue chuan, "Court chhungah khan ka engkim a awm a, basketball hi ka eng kima engkim a nih avangin tun hun aia ropui hi ka nunah a awm thei chuang lo," tiin a hun tawn tawha ropui ber ni maia a hriat thu a sawi.

Golden State tan a na

Steve Kerr leh a ho ten regu-lar season chu duthusama ṭhain an hmang a, match 82 an khelh aṭangin vawi 73 zet hnehna changin kum 1995-96 a Chicago Bulls-in record an lo siam tawh vawi 72 hnehna chan chu an rawn khum a, playoff-ah pawh harsa lutuk loin final an thleng.

NBA Finals-ah pawh hian 3-1 a hma an hruai fal nghal mai avangin a zawnin an champion ngei dawn niin a lang hman. Mahse, hun pawimawhah power forward Green chu hrem a ni a, match khat a khel thei lo. MVP Stephen Curry, Klay Thompson leh Andre Iguodala te chu an game hnuhnung pathumah hian player naran an ni.

Warriors head coach Kerr chuan, "Kum hnih chhunga kan khelh dan hi a ropui a, kan duhthusama ṭhain a tawp kan khar lo erawh hriatthiam a har sa hle, mahse hringnunah chuan hetiang hi a thleng
ṭhin," tiin a sawi.

Game 7 bika point 17 score-tu Curry chuan, "Ka team te hnehna chanpui tur khawpin ka khel ṭha tawk lo a, hei hian eng chenin nge ka rilru a luah dawn ka la sawi thei lo. Hnehna chan tuma ka beih pui zawng zawng te ka zah em em a, nakinah chuan ropui zawka kan la khelh chhuah theih ngei ka beisei," tiin a beidawn loh thu a sawi ve bawk.