Raonic hnehin Murray a champion

Andy Murray chuan Milos Raonic hnehin Aegon Championship nomawi a chawi a, he hmuna vawi nga champion thei hmasa ber a ni.

Queen's Club-a in-khelah champion lai 2 Murray hian Canadian Raonic lakah hian 6-7, 6-4, 6-3 in hnehna a chang. Murray hian set khatna a hloh hnuah set hnihnaah pawh 3-0 in a hniam zawk hman a, mahse tun tournament-a a service vawi 55 la hloh miah lo Raonic service chhuh sakin set a la let thei a ni.

Aegon Champion-ship-ah hian John Mc-Enroe, Boris Becker leh Roy Emerson te chu vawi li ṭheuh an lo champion tawh a, Murray hian heng mite khum hian record a rawn siam.

World number 2 Murray chuan, "He hmuna hlawhtlina ka chang leh ta hi ka lawm hle a, hei hian beiseina leh inrintawkna min siam belh ngei ang," tiin June 27 aṭanga khelh ṭan tur Wimbledon atan beiseina a neih thu a sawi.

Britain number 1 Murray hian Emirates ATP Ranking-ah point 500 a hmuh belh bakah €410,200 (Rs 3,13,59,731) a dawng bawk.