Goal khungtu mamawh Germany

2014 FIFA World Cup cham-pion Germany-in Euro 2016-ah vawi hnih an khel tawh a, goal la chhuah lo mah se goal khung lamah harsatna an nei tih zep rual a ni lo.

Zanin dar 9:30 hian Germany-in Parc des Princes-ah Northern Ireland an hmachhawn ang a, hemi rual chiah hian Marseille-ah Ukraine leh Poland an inkhel bawk dawn.

Germany-in an match hmasa berah Ukraine an hneh nghal a, goal khungtu erawh Shkodran Mustafi leh Bastian Schweinsteiger te an ni a, Poland an khelh ṭumin goal an khung lo.

Die Mannschaft tana goal khungtu Mustafi hi Mats Hummels dam hnuah tlarhnungah hmun a chang pha lo a, Schweinsteiger erawh inhliam vanga hun rei tak a khelh theih loh avangin France rama a zin tel ve hi mak titu an tam hle.

Joachim Low-a'n tlarhmaah Mario Gomez leh Lukas Podol-ski te a nei nachungin Bayern Munich-a hmun chang pha lo Mario Gotze a ring zawk. Liver-pool nena sawi zawm midfielder hian an khingpui tlarhnung tan buaina a siam pha meuh lo.

Germany boss Low chuan, "2006 FIFA World Cup khan Italy-in bul an ṭan ṭha lo a, keini erawhin kan ṭan ṭha thung. Semifinal-a kan hneh loh Italy an champion - tun
ṭumah hian Italy-in bul an ṭan ṭha a, keini erawh kan cheṭha tawk lo. Hei hian beiseina sang tak min pe a ni," tiin a eng zawng a thlir thu a sawi.

Goal khung loh vanga sawisel hlawh Thomas Muller chuan, "A chang chuan kan khelṭha chung pawhin goal kan khung loh vangin min sawisel a, kan khelh ṭhat loh pawhin goal kan khung chuan 'hero' ah min chhuah tho. Ronaldo khan penalty khung lo mah se a khel ṭha em em a, goal a khung loh vangin an sawisel," tiin media lam thlir dan a dik tawk loh thu a sawi.

Muller chuan goal khung châk ngawih ngawiha awm reng a ṭul thu a sawi tel a, Joachim Low-a'n an khelh dan a siksawi a nih chuan Bayern Munich forward hi a sir lam ni loin hmatawngah a awm thei bawk.

Competitive match bikah ram pahnih hi vawi 9 an inhmachhawn tawh a, Germany hi vawi nga chakin Northern Ireland hi vawi hnih an chak thung. 1984 World Cup qualifier-ah Northern Ireland hian Germamy hi ṭum hnih an hneh a, 1958 World Cup group stage-ah 2-2 in an inhnehtawk bawk.

Group C aṭangin Ukraine chiahin knockout stage beisei tur an nei tawh lo a, hei hian Poland hmabak a tih awlsam phah rin a ni. Amaherawhchu an match hnuhnung pangaah Poland-in Ukraine hi hneh an nei lo. 2014 World Cup qualifier-ah Ukraine hi vawi hnih chakin tun ṭuma team innghahna zinga mi Andriy Yarmolenko chuan goal a khung ve ve a, Dynamo Kiev winger hi zanina inkhel turah hian a hming a langsar ang.