France chelhtu Switzerland-in last 16 an lut
Pathianni zan khan Euro 2016 thlengtu France leh Switzerland an inhmachhawn a, team pahnih hian goal an khung loh ve ve avangin point an insem. France-in Group A hmahruaitu nichungin last 16 an lut a, Switzerland chuan pahnihna dinhmun luahin France hnung an zui ve bawk.
Group F inkhel dangah Albania chuan 1-0 in Romania an hneh a, pathumna nichungin last 16 luh beiseina an la nei. Euro-ah team 24 telin group rukah ṭhen an ni a, group tina pathumna zinga point hmu sang paliin knockout stage an luh dawn avangin Albania hian beisei an la nei a ni.
Pogba lansarh zan
Albania laka inkhel bul ṭan lo Paul Pogba chu inkhel bul
ṭan tir a ni a, Juventus midfielder hi khelmual chhungah a langsar hle. Kum 23-a upa midfielder hian Xherdan Shaqiri corner aṭanga ball lo kal goal tur nia ngaih chu goal bul aṭangin a pet chhuak a, hemi hnu hian bar vawi khat pet perin Switzerland keeper Yann Sommer chuan a goal shot chu vawi hnih lai ṭha takin a dan sak bawk.
Antoine Griezmann chuan second half-ah hun duhawm a nei bawk a, mah se Atletico Madrid forward goal shot hi a chet ṭhat zanah Borussia Monchengladbach keeper Sommer-a'n a chhuah duh lo a, Switzerland an him chhunzawm zel. Substitute Dimitri Payet chuan ṭum dang ang bawkin France tan goal a khung teuh hle a, mah se Moussa Sissoko ball cross ṭanga a volley ropui hian post a per hnuah goal pawnah a sawt chhuak.
Switzerland-in inkhel ṭan tir lama corner an hlawh chhuah bak chance ṭhaa sawi tur an nei lo a, injury time-a Bacary Sagna-a'n penalty area-a Blerim Dzemaili a pawh thluk chu penalty ngei tur niin lang mah se referee-in a ham tlat loh avangin France mualpho tur an him.
France buaina
France coach Didier Des-champs-a'n group stage match thum an khelh chhungin a starting XI a thlak danglam ziah a, Albania laka inkhel bul ṭan lo player pangain Switzerland lakah inkhel bul an ṭan.
Hei hi hrethiam loin France legend Thierry Henry chuan an ram chuan an starting XI ṭha ber pawh hre loin last 16 an luh thu a sawi a, a sawifiah thiam hle.
Ṭum dang ang bawkin minute 63-naa tlan lut Payet a hmuhnawm a, West Ham midfielder hian minute tlemte chhungin chance hlauhawm a neih bakah vawi 19 lai ball a tawk hman a, a thlak tak Kingsley Coman aiin vawi 13-in a khawih tam zawk!
Switzerland ve thung
Switzerland-in tun hmain European Championship-ah knockout stage an la lut ngai lo a, tun hi Euro-a vawi li an inlanna niin a vawi khat nan last 16 an khel ve dawn ta. Switzerland hian vawi sarih lai France hi hmachhawn tawhin chak hmel an la hmu miah lo a, Pathianni zan inkhelah pawh hian vawi ruk chiah shot neiin chak tur zia an pu lo.
Kum 2014 World Cup-a France laka 5-2 a an tlawm
ṭum ngaihtuah erawh chuan Switzerland-in hma an sawn tih a hmuh theih a, goal hmaah hlauhawm lo zawk mah se 58% ball changin France aiin ball an chang tam zawk.
Arsenal-in pound maktaduai 35-a an lei Granit Xhaka chuan a man to chhan khelmual chhungah a pholang nawn a, inkhelh chhung zawnga ball vawi 105 khawih fuhin vawi 94 pass a nei a, a ball pass zinga 89% chu a pass dik. France tana khel ṭha ber tih ngam Pogba-a'n ball vawi 73 a khawih a, vawi 46 ball pass-in a ball pass dik zat hi 78.3% a ni.
Thukhawchang
France coach Didier Des-champs chuan, "Goalkeeper ṭha tak hmachhawn lo ni ila chu goal kan khung ngei ang. Sawisel tur chu engtiklai pawhin a awm reng ang, ka lawmna erawh goal kan chhuah lo leh group hmahruaitu nichunga hnu kan khar thei hi a ni," tiin a naute a sawisel duh lo.
Switzerland coach Vladimir Petkovic chuan, "Hna ropui tak kan thawk a, pen khatin hma kan sawn a ni. Kan khel ṭha takzet a, hahdam leh chi ai loin kan khel a ni. Knockout stage kan khel ve dawn ta a, hnehna chan ngei kan tum ang," last 16 a thlir lawk der.
Albania an chak
European Championship chanchina a vawi khat nan Albania-in France an pan a, an match hmasa pahniha an chak loh hnuin Romania lakah 1-0 in an chak a, kum 1948 hnua Romania an hnehna hmasa ber a nih bawk avangin an result hi an ram chanchinah chhinchhiah reng a ni tawh ang.
He inkhela goal awmchhun hi Armando Sadiku khung a ni a, FC Zurich forward hian Romania keeper Ciprian Tatarusanu ban phak lohin minute 43-naah goal hi a khung a ni. Romania-in Florin Andone hmangin hun ṭha nei mah se Cordoba forward hian goal bar a pet per.
Albania manager Giovanni de Biasi chuan, "Albanian fan-te hnenah hlimna tam tak kan thlenin ka hria a, Albania rama cheng Albanian-te tan mai ni loin khawvel pumpuia Albanian-te tan zanin hi hlim zan a ni. Kan kalna apiangah eng dinhmuna kan din lai pawha min ṭawiawmtu fans ṭha tak kan nei reng hi a lawmawm a ni," tiin fan-te hnenah lawmthu a sawi.