Argentina laka fiahna hmachhawn tur USA
Copa America Centenario thlengtu United States chuan fiahna hautak an hmachhawn dawn a, Nilaini zing dar 6:30 hian NRG Stadium, Houston-ah Argentina nen semifinal an khel dawn.
A vawi khat nana final luh beisei US hian player langsar kawl khawm hran lo mah se inelna thlengtu an nih avangin fans an ngah a, an player 12-na (Fans) te hi an innghahna pakhat an ni. Hetihlai hian Argentina erawh kumin Copa America khel ram 16 zinga player nei ṭha ber an nih bakah he inelnaah hian vawi 14 an champion tawh thung.
Argentina hun?
Lionel Messi hoa khel Ar-gentina hi major tournament-ah kum 23 chhung zet an champion tawh lo a, 2014 FIFA World Cup leh nikum Copa America-ah te final lut mah se a chak lo zawkah an ṭang. Copa America Centenario khelh ṭan a nih dawn khan Gonzalo Higuain, Angel di Maria leh Messi te chuan kumin hi an kum ṭha a nih ve tawh ngei an beisei thu an sawi.
Venezuela 4-1 a an hneh
ṭuma goal khat khungtu Messi hian tun inelnaah hian goal li a khung tawh a, Argentina tan goal 54 khung tawhin Gabriel Batistuta record a nih rual tawh. Barcelona star hian record thar a siam ngeiin a rinawm a, US lakah hian a ni dawn em tih hi hmuh a chakawm tawh hle.
Gerardo Martino naute hian goal khung an harsat lo a, match li an khelh tawh
aṭanga goal 14 khung tawhin an lamah goal hnih chiah a la lut. Premier League club Manchester City leh Everton tlarhnung luahlumtu Nicolas Otamendi leh Ramiro Funes Mori te tan US forward Clint Dempsey hi ven bik ngai a ni ang. Fulham tan pawhs lo khel tawh Dempsey hian tun
ṭumah hian goal thum a khung tawh bakah a ṭhiante goal khung tur ṭum thum bawk a siamsak tawh.
Argentina coach Martino chuan Messi chungchang sawiin, "Leo hi inkhel thlak danglam hlawk thei a nih avangin kan khingpuite hian dan chah an tum ṭhin. Mahse, ani hi chuan ball khalh leh pass hun a hria a, a hliam a dam hnua a rawn inkhelh ve leh thei hian a teammate te pawh inrintawkna a siamsak," tiin Ballon d'Or chawimawina vawi nga dawng tawhtu a fak.
US an zam lo
United States coach Jurgen Klinsmann-a'n semifinal-a an hmachhawn tur Argentina leh Messi chu an hlauh bik loh thu a sawi a, ram pahnihte inhmachhawn tawhna vawi kua aṭanga vawi nga chak lo zawk an nih avangin German coach hna hi a awlsam dawn lo.
Kum 51-a upa Klinsmann chuan, "Quarterfinal khelh zawh a nih khan ka player-te hnenah Argentina hlau lo turin ka hrilh a, player langsar tak takte hi zah hle mah ila kan tan hnehna channa hun ṭha a nih thu ka hrilh tawh bawk a, kan zam lo," tiin a sawi.
Tlarhnung an ven uluk tur thu sawi chhunzawmin, "Ball chan tumin player zawng zawng an tlan tam tur a ni a, na takin kan um reng tur a ni ang. Kan ṭhat theih dan bera kan khelh chhuah a ngaih dawn avangin a nuamin a hlimawm dawn hle," tiin a thu a la zangkhai thiam hle.
Dempsey bakah midfielder Jermaine Jones, captain Michael Bradley leh Geoff Cameron ten Copa khelh mekah inkhel bul an la ṭan ziah a, anni hi US innghahna tur an ni leh ang.
Ram pahnihte intawn hnu-hnung ber chu 26 March 2011 kha niin goal khat ve ve khungin an inhnehtawk a, hemi ṭuma US player langsar ber chu goalkeeper Tim Howard a ni. Kumin Copa-ah erawh Premier League lama tawn hriat ngah tawh Howard hi inkhel bulṭan tura thlan zingah a tel rih ngai lo thung.