MFA Super Cup - Tu nge tel ngam?
Mizoram Football Association chuan District FA hnuaia club-te tan Mizoram Premier League club-te hneh theihna remchang a siam dawn a, inelna hming chu MFA Super Cup a ni. Rs 1,50,000 inchuhna a ni bawk.
Kalphung thar
Tualchhung football-ah MFA Super Cup vawi thum khelh a ni tawh a, MPL champion leh knockout inelna (MFA Cup/I Day Football) champion-te an inhmachhawn
ṭhin. Chanmari FC-in nomawi vawi hnih an chawi tawh a, Bethlehem Vengthlang FC chu champion lai an ni.
Tun ṭumah erawh match khat chauh a ni tawh dawn lo a, District FA hnuaia club zawng zawng tan tel theih a ni.
MPL club pariatte chu round of 16 aṭangin an khel ṭan ang a, club dang zawng chu DFA hnuaia first division emaw third division emaw pawh ni se first round aṭangin bul an ṭan ang.
Champion hian Rs 1,50,000 an dawng ang a, nomawi chawi inbeisei lo tan pawh pawisa dawn theihna remchang a awm dawn. Match tina chak zawk hian Rs 1,000 an dawng dawn a, hei hian first round aṭangin inelna boruak a tinung ang.
DFA ṭha hriatna
MFA hnuaiah hian DFA pariat - Aizawl, Champhai, Kolasib, Lawngtlai, Lunglei, Mamit Serchhip leh Siaha te an awm. Tun hi DFA hnuaia club-te fiahna ṭha tak a ni dawn bakah DFA chak leh chak lo hriatna a ni bawk ang.
MFA Super Cup hi Aizawla khelh tur a nih dawn avangin Aizawl DFA hnuaia club-te tan chuan tel a awlsam dawn a, season thar atana inpuahchahna ṭha tak a ni bawk ang. Amaherawhchu ADFA hnuaiah club an tam avangin player ṭha an insemdarh nasa tih chu hriat sa a ni a, Mizoram khawpui chhunga club-te hi khawpui pawn club laka pâwr nghal ngawt thei an ni lo.
June 30 thleng
MFA Super Cup-a tel tum club-te chuan June 30 thleng MFA Office-ah entry fee a pek theih a, District FA hnuaia club nei tan hun ṭha hi bawhpelh chi a ni lo.
Mizoram chhunga a vawi khat nan affiliated club zawng zawngte chu inelna huang khatah rin luh a ni dawn a, club tan history siamna hun ṭha a nih rualin player tan hun duhawm bik a ni.
MFA Super Cup khelh nan hun rei nghah a ngai tawh lo, dawihzep tan hmun a awm lo - a tel ngam tan erawh hmun a awm - tu nge tel ngam?