Croatia last 16 kalkawngah Spain

Kum li liam ta khan Croatia-in European Championship match hmasa pahnih aṭangin point li an hmu a, quarterfinal lut turin Spain draw chiah an mamawh. Amaherawhchu Vatreni (Croatia kohna) hian champion zui ta La Roja chu minute 88-naa Jesus Navas-a goal vanga hneh loin group stage an paltlang lo a, anmahni aia lut Italy-in final an thleng bawk.

Zanin dar 12:30 hian point li hmu tawh Croatia-in tling chiang tawh Spain bawk an hmachhawn dawn a, hemi rual chiah hian Czech Republic leh Turkey an inkhel dawn bawk. Euro 2016-ah pathumna zinga tiṭha team paliin last 16 an thlen theih avangin Croatia hi an tlak a rinawm tawh lo a, amaherawhchu Ante Cacic-a hote hi an chak lo a, Czech-in hnehna an chan si chuan group dang result-ah an innghah a ṭul dawn.

Modric tel loin

Croatia-in midfielder Luka Modric awm loh hnuah Czech Republic laka an goal hnih an hum thei lo a, Real Madrid mid-fielder hian inhliam vangin Spain a hmachhawn thei dawn lo.

Croatia coach Ante Cacic-a'n Spain hmachhawn tura an inpuahchahnaah Czech Republic hmaa a tih ang chiahin player-te chu team hnihah a ṭhen hrang a, team pakhat zawk chu champion lai hmachhawn tura rin a ni. Training-na anga an khel a nih chuan Ivan Rakitic chu midfield-ah awm thoin tlarhnung a pui tam zawk ang a, kum 19-a upa Ante Coric chu attacking midfield-ah a awm ang.

Dinamo Zagreb midfielder Coric hi Croatia chanchinbu 'Vecernji list' chuan kum 2015 khan Croatian Hope of the Year-ah a lo thlang tawh a, chutihrualin player hming aṭanga thlir chuan Modric thlak tura awm zawk erawh Real Madrid tana khel tho Mateo Kovacic a ni. Juventus striker Mario Mandzukic hnung-ah kum 22-a upa Kovacic emaw Coric emaw pawh awm se Croatia inkhel hi a hmuhnawm leh ang.

Spain an chungnung

Croatia-in March 1994 khan Robert Prosinecki leh Davor Suker te goal hmangin friendly match-ah Spain an hneh a, hei hi La Roja nen vawi nga an inkhel tawha an chak chhun a ni. Spain hian Croatia hi vawi thum an hneh tawh a, last 16 an luh chian tawh avangin zanin hian player engemawzat chu an awltir rin a ni.

Spain hi Croatia hmachhawn turin an dam kim a, Pathiannia an training-naah chuan player te hi an chhungten an ṭawiawm. Training tawp lamah full match practice neiin first team lama khel te chu David de Gea, Hector Bellerin, Gerard Pique, Mikel San Jose, Jordi Alba, Sergio Busquets, David Silva, Koke, Andres Iniesta, Nolito leh Aritz Aduriz te an ni.

Marca-in poll a laknaah chuan last 16 an luh tawh tho avangin De Gea aiah Iker Casillas lut tura duhtu an tam zawk a, eng pawh chu ni se Vicente del Bosque thukhawchang aṭangin starting eleven an siksawi dawn tih a chiang. Spain boss chuan, "Player kan thlak danglam a, amaherawhchu Croatia hneh thei tur kan luhtir ang," tiin a sawi.

Czech hmabak

Czech Republic-in Tomas Rosicky chu inhliam vangin an chhawr thei dawn lo a, team captain hian khel thei dawn tawh lo mah se a a team-te hi a la hawsan dawn bik lo.

Czech coach Pavel Vrba chuan, "Rosicky awm loh vang pawh ni chuang loin starting eleven hi ka thlak danglam dawn. Croatia nen khan khel ṭha tak tak an awm a, chuvangin player pathum emaw pali emaw ka thlak ang," tiin a sawi.

Croatia an draw ṭumin Czech substitute Milan Skoda leh Tomas Necid ten goal an khung a, Turkey an hmachhawn hunah an khelh beisei a ni. Spain laka mualpho Turkey hian hnehna an chang a nih chuan Euro 2016-ah beiseina an la neih chhunzawm dawn avangin inkhel hmuhnawm tak beisei a ni.

Ram pahnih hi qualifier-ah an awm dun a, Turkey-in Selcuk Inan leh Hakan Calhanoglu te goal hmangin khualmualah 2-0 in an hneh a, Czech Republic-in Tomas Sivok leh Borek Dockal te hmangin an hneh let ve bawk. Vawi 19 an inkhelh tawhnaah erawh Czech hi vawi 12 an chak a, Turkey hi vawi li chiah an la chak.