Cristiano Ronaldo record siam zan?

Portugal leh Austria goal awm loa an inhnehtawk ṭumin Cristiano Ronaldo-a'n an ram tana khel hnem ber record a siam a, Real Madrid forward hian Hungary lama goal a khung thei a nih chuan European Championship ṭum lia goal khung thei hmasa ber a ni ang.

Zanin dar 9:30 hian Lyon-ah Portugal leh Hungary an inkhel ang a, hemi rual chiah hian Group F inkhel dangah Iceland leh Austria te Saint Denis-ah an inkhel bawk ang.

Portugal an chungnung

Portugal-in Hungary vawi 10 an hmachhawn tawhah vawi sarih hnehna an chang a, vawi thum an inhnehtawk. Competitive match-ah bik phei chuan Portugal hi vawi nga an inkhelh tawhah an chak vek a, Euro 2000 qualifier leh 2010 FIFA World Cup qualifier-ah Portugal hi a chungnung zawkah an ṭang ve ve.

Inelna lian thama an intawn hnuhnun ber chu 1966 FIFA World Cup daih tawh kha a ni a, Old Trafford-ah Portugal 3-1 in an chak. Mak ang reng tak chu Portugal leh Hungary ten an group aṭanga quarterfinal an luh laiin football ram ropui Brazil erawh first round-ah an tla thung. Kum 50 liam taa Portugal inngahna chu Eusebio a ni a, 'Black Pearl' hming lem an pek Portuguese striker hian 1966 World Cup-ah goal kua khungin top scorer a nih bakah an ram chu pathumna a nih pui bawk.

1966 World Cup hi England thlen kum a nih avangin sawi zui a hlawh a, hemi ṭum hi kum 28 chhung FIFA World Cup-a entu tam ber ṭum niin USA-in 1994 World Cup a thlen khan record hi thai chhiat a ni chauh. Hei vang hian kum 50 liam taa top scorer Eusebio hi Portugal tan a hlu lehzual a, Ronaldo meuh pawhin Black Pearl-a ropuina hi a hliah khuh thei meuh lo.

Ronaldo ropui zan?

Austria lamah penalty hlahin a goal khung offside vangin pawm lo mah se Ronaldo hian ram tan 128 a inlan tawhin July 8, 2006-a Luis Figo record siam chu a khum. Hei chauh hi a ni lo, Real Madrid forward hian ram tan goal 58 khung tawhin amah hnaihtu Pauleta (47), Eusebio (41), Luis Figo (32) leh Nuno Gomes (29) ten football an khelh tawh loh avangin a record hi khumtu an awm lawk lo ang.

Ronaldo hian Euro 2004 khan Portugal tan a inlan tawh a, hemi ṭum hian goal hnih a khung bakah Euro 2008 (Goal 1) leh Euro 2012 (3)-ah te goal a khung avangin tun inelnaa goal a khung leh a nih chuan European Championship ṭum lia goal khung thei hmasa ber a ni dawn. Portugal-in knockout stage lut turin goal an mamawh a, goal khung player pakhat chauh thlan tur ni se Ronaldo aia thlan tur an awm lo.

Zanin hi Ronaldo ropui zan a ni thei a, amaherawhchu a thiamna a san em bik em avangin mawhphurhna pawh a chang tam. Portugal-in Hungary lakah result ṭha an hlawh chhuak thei lo a nih ngat chuan sawisel rawn tur erawh Ronaldo tho a ni a, Real Madrid forward hmuaktu chu ropuina a nih loh chuan mualphona a ni.

Ronaldo ringtu coach

Portugal coach Fernando San-tos chuan, "Hungary nena kan inkhelh tur hi final a ni. Kan chak a nih chuan group hmahruaitu kan ni ang. Goal chance tam tak insiam chungin goal khung loh chang hi a awm hrim hrim. FIFA ranking-a 10-na ni pha Austria lakah ṭha takin kan khel thei a, Hungary lakah hian kan khelh ṭhat chhunzawm a ṭul a ni. Point li an hmuh tawh avangin an tan draw a ngai a, keini chuan chak kan mamawh," tiin an team dinhmun a sawi.

Ronaldo chungchang sawiin Santos chuan, "Ronaldo hi goal tam tak khung thei player a ni a, Hungary lamah pawh hian a khung ngei ka ring. Kan khingpuite hian goal venhim an tum dawn a, keini chuan chak hrim hrim kan tum dawn. Hun khirh tak aṭang hian kan thawhchhuah ngei ka ring," a ti.

Thawhṭannia Portugal training-naah midfielder Andre Gomes leh left back Raphael Guerreiro te chu inhliam vangin an tel ve lo a, he thu ziah lai hian player dinhmun tak hi a hriat hman loh.

Hungary lam

Hungary-in Austria hnehin bul an ṭan a, Iceland lakah point khat hlu tak an hlawh chhuak bawk a, an phur lai hneh hi Portugal tan a awlsam dawn lo. Tun inelnaa player hmuhnawm captain Balazs Dzsudzsak chuan, "Min ṭantute leh team inkar boruak
ṭha hi kan chetṭhat chhan pakhat a ni a, buaina siam loin team min tihphur chhoh zel ka beisei a ni. A tawpa Hungary dinhmun kan hriatna tur chu field chhunga kan khelh dan a ni tur a ni a, mipui buainain kan result a nghawng tur a ni lo," tiin a sawi.

Iceland Vs Austria

Iceland hian Austria hi an la hneh ngai lo a, amaherawhchu hmun hima awm an tum a nih chuan chak ngei ngei an mamawh. 1990 World Cup qualifier-ah Austria hian Iceland hi vawi khat an hneh a, pakhat dangah erawh an inhnehtawk. Hemi hnu hian May 2014 khan friendly match-ah an intawng leh a, 1-1 a inhnehtawkin chak zawk an awm lo.

Iceland hi mipui 330,000 vel lek chenna ram a ni a, Austria erawh maktaduai 8.4 zet awmna niin Iceland mipui let 25 vel awmna an ni thung. Amaherawhchu football-ah chuan engmah sawi lawk thei a ni lo a, Austria tana a harsa lai tur erawh attacking football khelh a ṭul tur hi a ni. Austria forward Marko Arnautovic chuan, "Portugal lamah goal venhim kan thiam tih kan pho chhuak tawh a, Iceland lamah goal nawr kan thiam tih lantir leh a ṭul a ni," tiin a sawi.

Group tin aṭangin pahnih zelin knockout stage an thleng dawn a, group pariat aṭangin pathumna paliin last 16 an lut dawn bawk. Group F aṭanga point li hmu tawh Hungary hi Portugal laka an chak loh a rinawm zawk avangin Iceland leh Austria tan chuan point thum chauh hi last 16 an luh theihna kawngah a ngaih a theih.