Kingsley Coman a la tlan chak ber

European Cham-pion-ship khelh meka la tlan chak ber chu France winger Kingsley Coman a ni. Kum 20-a upa Bayern Munich winger hi France leh Switzerland inkhelh ṭuma a tlan chak lai ber chu 32.8 km/hr a ni.

Tlan chak zawng teh tur hian metre hnih an thleng tura an hawlh san lai ber hmang a ni a, hei vang hian player tlan chak zawk hi khawvel tlan chak ber tehna 100 metre race te nen chuan khaikhin chi a ni lo.

Thil nung (hnim lam chi tiam loin) zinga speed sang ber chu mu chi khat peregrine falcon a ni a, heng mu hian sang taka an thlawh hnua chak taka lei lam zawnga an thlawh chak zawng chu 389 km/hr a ni pha hial. Leia khawsa zingah erawh Cheetah a tlan chak ber a, heng keite chi khat tlan chak lai ber hi 120.7 km/hr anga chhut a ni.

Mihring zingah erawh Usain Bolt chu tlan chak ber ni lai a ni a, Jamaican sprinter hi 100 metre intlansiakah a tlan chak ber ṭumin 41 km/hr in a tlan. Hetihlai hian ran-nung thatchhia leh che muang tiha an sawi Sloth chu tlan chak lai berin 0.12 km/hr chauhin a tlan thung.

Tu nge tlan tam?

Euro 2016 match khat chhunga tlan tam ber chu Marco Parolo a ni a, Italy midfielder hian Belgium an hneh ṭumin 12,570 m zet a tlan. Lazio midfielder Parolo hian minute 90 chhungin 8.38 km/hr in a tlan reng tihna a ni.

Ethiopian long-dis-tance runner Kenenisa Bekele chuan kum 2005 khan Brussels-ah 10,000m intlansiaknaah record a siam a, Bekele hi 22.82 km/hr a tlan char char ang a ni. English hmeichhe long-distance runner Paula Radcliffe-i'n kum 2003-a London Marathon-a record a siam khan a tlan chak zawng chu 18.68 km/hr a ni.

London Marathon-a an tlan thui zawng hi 42.16 km a ni a, a nawlpuiin hemi tlan thleng tur hian 4hrs 4mins 23 secs an hmang. Chumi awmzia chu a nawlpui tlan chak zawng chu 10.35 km/hr a ni a, tun Euro 2016-a tlan tam ber Parolo hian London Marathon-a mi nawlpui tlan chak dan average hi a pha lo.

Euro 2016-a player tlan chakte :

Speed (km/hr)* Player Match

32.8 Kingsley Coman France Vs Switzerland

31.6 Richárd Guzmics Hungary Vs Austria

31.5 Kolbeinn Sigthórsson Iceland Vs Portugal

31.4 Birkir Sævarsson Iceland Vs Portugal

31.4 Xherdan Shaqiri Switzerland Vs France

31.2 Jonny Evans Northern Ireland Vs Poland

31.2 Dragos Grigore Romania Vs Albania

31.1 Ragnar Sigurdsson Iceland Vs Portugal

31 Nani Portugal Vs Iceland

30.9 Georgi Schennikov Russia Vs Slovakia

* metre hnih chhunga player mimal tlan chak lai ber lak a ni.

Euro 2016-a player tlan tamte :

Distance (m) Player Match

12,570 Marco Parolo Italy v Belgium

12,563 Vladimír Darida Czech Republic v Croatia

12,374 Emanuele Giaccherini Italy v Belgium

12,341 Vladimír Darida Czech Republic v Spain

12,290 Peter Pekarík Slovakia v Wales

12,268 Ádám Nagy Hungary v Austria

12,150 Taras Stepanenko Ukraine v Germany

12,143 Amir Abrashi Albania v Switzerland

12,081 Adam Lallana England v Russia

12,081 Marcelo Brozovic Croatia v Czech Republic