Copa America Centenario Vidal tel lohna Chile hmachhawn tur Colombia

Naktuk zing dar 5:30 hian Copa America Centenario semifinal match hnuhnung zawk khelh a ni dawn a, champion lai Chile leh Colombia te chu Soldier Field, Chicago-ah an inhmachhawn dawn.

Chile hian an intawn tawhnaah vawi 14 hnehna changin Colombia hi ṭum 10 an chak ve tawh thung a; vawi 12 an inhnehtawk tawh bawk. Tun hnai kum 16 chhungin Chile hi an ropui bik lem lo a, vawi li chiah a chak zawkah ṭangin Colombia hi vawi riat an chak thung. Tun laia ram pahnihte player thlirin an intiat tawk a, inkhel hmuhnawm tak a ni ang.

Vidal tel lohna Chile

Nikum khan Chile hian Copa America thlengin final-ah Argentina chu penalty shootout-a hnehin an ram chanchina a vawi khat nan major tournament-ah an champion. Hemi ṭuma an player pawimawh Arturo Vidal, Alexis Sanchez leh Eduardo Vargas te chu tun ṭumah pawh hian an innghahna an la ni.

Bayern Munich midfielder Vidal hi yellow card vawi hnih a hmuh tawh avangin match khat khel thei lo tura hrem a ni a, Bolivia an hneh ṭuma goal hnih khungtu Vidal hian Colombia a hmachhawn thei dawn lo.

Chile hian an match hmasa berah Argentina 2-1 in hneh lo mah se a hnu lamah an chesual nawn tawh lo a, quarterfinal a thlen meuh chuan champion tura rinkai ni phak Mexico chu 7-0 ngawtin an sawp; hemi
ṭuma goal li khung tu Vargas hian tun inelnaah hian goal ruk khung tawhin ani aia khung tam an awm lo a, Colombia tlarhnung tan Hoffenheim forward hi ven ngun bik a ngai ang.

Semifinal thlirlawkin Vargas chuan, "Champion tura rinkai ber kan ni lo chungin kan khelh danah kan lungawi tawh. Mexico lakah duhthusama
ṭhain khel mah ila Colombia khelh dan phung hi a danglam daih dawn avangn inrin thiam a harsa a, inbuatsaihna erawh kan nei ṭha hle," a ti.

Pekerman-a thluak

Colombia manager Jose Pekerman hi manager fing tia sawi ṭhin a ni a, tun ṭumah pawh hian team langsar lutuk ni lo mah se a tlo ber pawl an ni tih chu kan hmu tawh. Colombia hi kum 2001-a an champion hnuah Copa America-ah hian final an la lut leh lo a, kuminah beiseina an nei sang hle.

2014 FIFA World Cup top scorer James Rodriguez-a'n a thiam a la theihnghilh lo a, an match hmasa bera United States an hneh ṭum leh Paraguay an hneh ṭumin goal a khung. Quarterfinal-a Peru nen an inhmachhawn ṭum erawhin goal khung chiah lo mah se ball ṭha taka tak a tlan luh pui bakah pass ṭha tak tak a nei bawk.

Real Madrid midfielder bakah hian Juan Cuadrado, Edwin Cardona leh Carlos Bacca te hi inkhel boruak thlak danglam thei khawpa theihna nei an ni a, Peru laka penalty dangtu Arsenal goalkeeper David Ospina hi innghahna tham a ni bawk.

An khingpui tur Chile chu player pakhata innghat an nih loh thu sawiin Colombia coach Pekerman chuan, "Chile hi player pakhata innghat an nih loh zia chu an goal khungtu aṭang hian a chiang. Vidal hi player pawimawh chu a ni ngei a, mahse ani tel lo pawh hian team ṭha tak an ni a, a hmunruak luahkhat tur pawh an nei," tiin a sawi.