Bengaluru-ah Johnson a cham zel dawn

English defender John Johnson chuan Bengaluru FC-ah kum hnih dang cham turin contract thar a ziak. John Johnson hian Curtis Osano nen Bengaluru tlarhnungah inkawpin league match 15-ah goal 12 chiah an chhuah a, I League-a tlarhnung inkawp nghet ber pawl an ni.

Bengaluru chief operating officer Mustafa Ghouse chuan, "John Johnson hi kan club tan a pawimawhin captain armband hren kher ngai loa khelmual chhunga hruaitu ṭha a ni. Kan hnenah season hnih dang cham tura thutlukna a siam hian min ti lawm takzet a ni," tiin I league best defender-a thlanin an hnena cham zel a thlang chu an lawm thu a sawi.

Middlesbrough defender hlui chuan, "Bengaluru FC-a contract thar ka ziak thei hi ka lawm hle a, season thum hun ka hman chhunga minute tin kha nuam ka ti em em vek a ni. He club-ah hian hnathawh tur tam tak ka la neiin ka hria a, fan-ten min ṭawiawm ṭhat avangin anni nena kan thawk ho leh tur hi ka lawm a ni," a ti.

Kum 27-a upa defender hian kum 2013 khan League Two club Northampton Town aṭangin Bengaluru hi a zawm a, India rama amah sawm luttu Ashley Westwood-a'n Bangalore club hi enkawl chhunzawm dawn lo mah se cham zel a thlang ta a ni.